De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 290,001 Auteur: Luquet Gatelus Genre: Sirventes Numero: CLVII

Cora q’eu fos marritz ni consiros

I	1	Cora q’eu fos marritz ni consiros
		Per dan de pretz, qe chascus relinqia,
		Aram conort e son gais e joios,
		Car jois e pretz revendra qis perdia;
	5	Car lo pros coms Proenzals Lumbardia
		Vol conqerer et Toscas e Puilles,
		E d’autra part Conratz vol son paes,
		El reis Matfre non s’i acorda mia;
		Per q’entrels faitz aura Pretz sa bailia.
II	10	Sel pros Coms val segon q’es poderos,
		Un mirail ha on mirar se deuria:
		E ses mires els faitz del rei N’Anfos,
		Ben sai per cert qe tant non tardaria
		Zo q’a empres, qe laissar non poiria
	15	S’el non laisses tot lo pres q’a conqes;
		Qel bruitz es tant vas totas partz estes
		Q’o sabon ja de la mar, en Suria,
		E d’Espagna entro en Normandia.
III		Donc, albir se, pois tals es lo rezos,
	20	Si s’en rema, tot zo q’om en diria;
		E membre li qe Carl ab sos baros
		Conques Puilla e n’ac la segnioria,
		E dels granz faitz qe Franza far solia:
		Ara n’estan avol cor en defes;
	25	E, pois lo noms de Carle en lui es,
		Segals seus faitz, q’estiers a tort seria
		Per sel clamatz qe valc, s’el non valia.
IV		E, se Conratz non es valenz e pros,
		Deslignara; car li seu an Soria,
	30	Non eral seu bastant, se plus noi fos;
		Doncs, se laissa so q’esser seu deuria,
		Fara semblant qe mal l’autrui tenria;
		E, si nol ven recobrar demanes,
		Fara creire so qel Reis diz espes,
	35	Q’el sia mortz e q’autr’el sieu luec sia,
		Qe, s’el fos vius, lo sieu demandaria.
V		Sel reis Matfres fos princeps coratjos
		Ni so qe te conqes per galiardia,
		S’era o pert, qant es reis, per un dos
	40	N’aura blasme; car mais de carestia
		Lo deu gardar, c’om plus l’ac a fadia;
		E als baros, ont ha tant del seu mes,
		Membre cal son ni eran ni con es;
		E penz chascuns de gardar noig e dia
	45	Zo q’ab autre segnor mais non auria.
VI		Bernart, apren e chantal sirventes,
		E poiras dir, sel cor no fail als tres,
		Qel juecs sera entaulatz ses faillia;
		Mas tant o voil q’eu non crei qe ja sia.