De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 282,007 Auteur: Lanfranc Cigala Genre: Planh Numero: CLXXVIII

Eu non chant ges per talan de chantar

I	1	Eu non chant ges per talan de chantar,
		Mas, si chant, eu non chant, mas, chantan, plor,
		Per c’aital chan deu hom clamar chan–plor,
		Car es mesclatz lo chanz ab lo plorar;
	5	E non dig’om q’ieu aja fait faillenza
		D’aital mesclar, car zo qu’eu dic ploran
		Non poiri’om suffrir d’auzir ses chan;
		Tant es mortals la perd’eill meschaenza.
II		Car morta es cella qu’era ses par
	10	De pretz prezat e de valen valor,
		De cortes ditz e de faitz e d’onor,
		D’eseingnamen, d’acuillir e d’onrar:
		Na Berlenda, domna de conoissenza;
		Per cui devon plorar li pauc eil gran,
	15	Car il era de tot fait benestan
		Cim’e raditz, flors e frutz e semenza.
III		Mort es tot zo qu’el mon era de car,
		E zo per qe valion li meillor,
		E zo per qe chantavon chantador,
	20	E zo per qe prezavon domnejar,
		E zo per qe valia mels valenza,
		E zo per qe estava autr’enan;
		Plor doncs cascus, qe passat son mil an
		Que mortz no fes tan gran desconoissenza.
IV	25	Om non la vi ni non l’auzi nomnar
		Qe non la fes sa domn’e son segnor,
		Car fazia ab gaug et ab douzor
		Los crois valer els valenz afinar;
		E doncs, per que no mor totail Proenza
	30	Ont il mori, e tuit cil qe i estan?
		C’oimais en dol et en consir viuran,
		E so li er piegz de mort, a ma parvenza.
V		Pero, sivals hom non la pot comtar
		Mal a son ops, mas a nostra dolor,
	35	Car uns comtatz non l’era pron d’onor;
		Per qe lla vol Dieus en Cel far regnar,
		E si tot sai en reman dechaenza;
		Li saint Angel l’amportaron chantan
		Per son profeg; si tot nos torn’a dan,
	40	Nos deu adur de plorar estenenza.
VI		Luresana, pensatz de penedenza,
		Que Dieus vos vol confondre derenan,
		E pareis ben al sobremortal dan
		C’aves aut que vostra mort comenza.