Wolf, George; Rosenstein, Roy. The Poetry of Cercamon and Jaufre Rudel. New York & London: Garland Publishing, Inc, 1983

[CdT en procés d'incorporació]

Code: 112,001a Auteur: Cercamon Genre: Sirventes Numero: 7

Ab lo pascor m’es bel q’eu chant

I	1	Ab lo pascor     m’es bel q’eu chant
		en estiu, a l’entran de mai,
		can par la flor     sobre·l verchant,
		e son reverdezit li glai:
	5	mout mi val pauc lo temps cortes,
		q’eu non ai joi, ni non l’ades,
		ni de sa compagnia no·m lau.
II		Per qe d’amor     an atretan—
		li malvas, enojos savai—
	10	con li meillor     e·l plus prezan;
		Jovenz, e Faig, fraing e dechai,
		e Malvestatz a son luec pres
		en amistatz, c’amics non es
		amatz, ni d’amigua no·s jau.
III	15	Ben sai qe lor     es mal estan
		als molleiratz, car se fan gai
		domnejador     ni drudejan;
		e·l guizardos qe lor n’eschai
		ditz el reprocher lo pajes:
	20	qi glazi fai, a glazi es
		feritz d’eis lo seu colp mortau.
IV		Fals amador,     al meu semblan,
		vostr’er lo danz, e no·n pueis mai;
		de gran folor     es acordan
	25	can l’us l’autre gali’e trai;
		e pos vos [o] aves enqes,
		drut, moiller e marit— tug tres—
		sias del pechat comunau.
V		El fuec major     seretz creman,
	30	al juzizi del derrer plai,
		enganador     fel deslian,
		en la pena qe non trasvai,
		on sera totz lo mals e·l bes
		jutjatz, e [ja] no·m clam merces
	35	domna c’aia drut desleiau.
VI		Non a valor     d’aissi enan
		cela c’ab dos ni ab tres jai,
		et ai! n’encor     lo cor tristan
		qe Dieus tan falsa non fetz sai;
	40	miels li fora ja non nasqes,
		enanz qe failliment f[ez]es
		don er parlat tro en Peitau.
VII		Saint Salvador,      fai m’albergan
		lai el regne on mi donz estai,
	45	ab la genzor,      si q’en baizan
		sien nostre coven verai;
		e qe·m do zo qe m’a promes;
		pueis al jorn m’en ira[i] conqes,
		si be l’es mal al gelos brau.
VIII	50	Amics, diguas li·m can la ves,
		si passa·l terme q’avem pres,
		q’ieu soi mo[r]tz, per Sain Nicolau!