Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 406,037 Auteur: Raimon de Miraval Genre: Canso Numero: I

S'a drech fos chantars grazitz

I	1	S'a drech fos chantars grazitz,
		Ben chantera pus soven ;
		Mas vejair 'es a la gen
		Que totz chantars si 'engals ;
	5	Per qu'ieu no seria sals,
		Qu'ieu vuelh grat de las melhors,
		S'entre·ls desconoissedors
		E domnas de mals talans
		Sovendejava mos chans.
II	10	Qu'ieu sai so que cascus ditz
		Al pus celat parlamen ;
		Car per lur descauzimen
		Fan creir 'a domnas manhs mals
		E donan sos cosselhs fals
	15	Que no sofran trobadors ;
		So don gent se serv amors
		Qu'a, celui tanh mielhs demans
		Que mais a d'aips benestans.
III		Si·s larcs cortes et arditz
	20	E sap servir d'avinen,
		Sos chans quals domna·l defen ?
		Vers es que trobar ses als
		Non es proeza cabals
		Ni sol us mestiers valors ;
	25	Pero corteza lauzors,
		Benditz et honratz bobans
		Es de totz bos pretz enans.
IV		D'aisso·m tenh per enriquitz
		Car la bel' en cui m'enten
	30	Conois qui·l ditz ver o·lh men ;
		Per que·l sui del tot leials,
		Qu'amics leugiers ni venals
		Non pren d'onrat loc secors
		Doncs pus tan me platz l·honors
	35	En patz dei sofrir los dans
		Que·l pros me semble pus grans.
V		Si·m fas ieu qu'als pus falhitz
		Soi de bel captenemen
		E·n parl'ensenhadamen
	40	Ab mos enemics mortals,
		Qu'a penas conoisson quals
		De lor en tenh per pejors ;
		E non es tan greus dolors
		A drut ni pus durs afans
	45	D'onrar lauzengiers truans.
VI		Domna, vos m'etz del tot guitz,
		Qu'ieu non ai foldat ni sen
		Mas al vostre mandamen ;
		Tan m'es lo dezirs corals
	50	Qu·us ans me sembla jornals :
		Si m'es loncs atens paors
		E si·m par mos chans folors,
		Qu'en domnei, ses totz engans,
		Es greu termes de tres ans.
VII	55	« Mais d'Amic », d'autras ricors
		Que·us semblarian majors,
		Vos val « Miravals » dos tans,
		Quar l'avetz ses totz engans.
VIII		« N'Audiartz », totas valors
	60	Daura domneis et amors,
		E no·us segra mais balans
		Pus a vos platz que s'enans.