Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Témoignage
* Traductions
* Images

Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 406,046 Auteur: Raimon de Miraval Genre: Canso Numero: II

Tuit cilh que van demandan

I 1 Tuit cilh que van demandan
    Si cantarai ogan mais,
    Volh que sapchan per que can
    E per qual razo m'en lais.
  5 Non es mos cans tan venals
    Qu'a totz sia cominals ;
    Qu'en aquel temps volh faire ma canso
    Quan melhs m'estai d'amor e de razo.
     
II   E soi m'en tarzatz ogan,
  10 Quar sonetz d'auzel no·m pais,
    Ni fresca flors de vergan
    Lo consir del cor no·m trais,
    Que m·es tan durs e corals
    Qu'a pauc seria mortals,
  15 Don nula res no·m pot dar garizo,
    Si ma domna no·m vol far oc del no.
     
III   Pels tortz que las domnas fan,
    Torna domneis en biais,
    Que tan li mostron d'engan
  20 Per que·l plus fis drutz s·irais ;
    Trobar en pot hom de tals,
    Mas ieu no dirai ges quals,
    Cui servit ai e volgran guizardo,
    E preiran ben esmend' en loc de do.
     
IV 25 Pois tot quant ma domna man
    M'es aissi deleitz e jais
    Obezir de bon talan,
    Qu'anc son mandamen non frais.
    Gardatz si·n degr'esser sals
  30 Qu'en patz n'ai sufertz maintz mals,
    Neis del sieu dan pogr' aver fait mon pro
    Mas anc no·m plac res qu'a lieis non fos bo.
     
V   Qu'ie·lh van tot jorns repropchan
    Quar on melhs li sui verais,
  35 Ela·m ment e·m vai trichan...
    Er ai ben dit que savais,
    Qu'ilh es fina e leials
    Et ieu messongiers e fals...
    Perdrai la donx si totz temps li perdo ?
  40 Ieu, oc, qu'ab mal deu hom vencer felo.
     
VI   Mas li dangier son trop gran...
    Mas mentir n'ai per lo cais,
    Com plus en vau cossiran
    No conosc qu'en re·m biais ;
  45 Ben posc doncs dir mas non als,
    Quar sa beutatz naturals
    E·l gens parlars l'an mes'en tal resso
    Qu'om que·lh vol mal no troba companho.
     
VII   « Mais d'amic », los bes e·ls mals
  50 Degr'om partir cominals ;
    Mas vos n'avetz lo gaug, e·l pretz e·l pro,
    Et ieu non ai mas ir'e cor felo.
     
VIII   Mantels plus qu'emperials
    Etz, qu'en vos non a ren fals :
  55 Or, ni tessel, ni fonda, ni peno
    Ni mais ni meins no·i cove per razo.
     
IX   « Mon Pastoret » vei sobre tot baro
    De domnejar e d'amar e de do.
     
X   « Mon Audiart », si·m fos aital com fo
  60 Amer'ieu mais qu'ome de sotz lo tro.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI