Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 406,028 Auteur: Raimon de Miraval Genre: Canso Numero: III

Entre dos volers sui pensius

I	1	Entre dos volers sui pensius,
		Que·l cors me ditz que no chant mais,
		Et amors no vol que m'en lais
		Mentre qu·el segle estarai vius.
	5	De laissar agr' eu razo
		Que mais no fezes canso ;
		Mas per so chant quar amors e jovens
		Restauran tot quant tol mesur'e sens.
II		E s'anc nulh jorn fui esforcius
	10	D'esser adreitz cortes e gais,
		Ara cove que m'i eslais
		Ab ditz et ab faitz agradius ;
		Qu'en tal domn' ai sospeisso
		Que·l sieu ric car guizardo
	15	No pot servir nulhs hom desavinens
		Si tot s'es rics e poderos e gens.
III		Ab aitals honratz senhorius
		Ai ieu estat toztemps verrais
		Qu'afans ni pena ni esglais
	20	Ni nuls maltraitz no m'es esquius.
		Quar tuit dizon a lairo
		Qu'anc d'amor no fi mon pro,
		Menton, qu'avut n'ai bes e gauzimens
		E n'ai sofert dans e galiamens.
IV	25	Vas bona dona sui antius
		Quan ja fa ren don sos pretz bais ;
		E quar una domneta·m trais,
		Tornar me'n ai vïlas mesclius ?
		Non, qu'a lieis sabria ho
	30	Si la tornav' en resso ;
		Qu'a las avols no ten dan falhimens
		E prezo·s mais per gaps e per contens.
V		De cui que·s vol baisse sos brius
		Pos l'onors midons mont'e nais ;
	35	Qu'aissi com la rosa e·l glais
		Gensan quan repaira l'estius,
		Ma domn'a tot l'an sazo
		Qu'il sap gensar sa faisso
		Ab bels semblans et ab coindes parvens,
	40	Don creis sos pretz e sos captenemens.
VI		Per lieis, am fontanas e rius
		Prats e vergiers e boscs e plais,
		Las domnas e·ls pros e·ls savais,
		E·ls fols, e·ls savis, e·ls badius
	45	De la franca regio
		D'on il es e d'enviro ;
		Quar tant es lai viratz mos pessamens
		Que mais no cug sia terra ni gens.
VII		N'azalaïs de Boissazo
	50	Fai son pretz melhor de bo ;
		E perda Dieus qui l'er desavinens,
		Pois tan gen sec sos bels comensamens.
VIII		Novel' amors mi somo
		Qu'ie·l serva d'aital razo,
	55	Qu'a Miraval es totz establimens
		Dels bes d'amor e dels verais covens.