Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 406,021 Auteur: Raimon de Miraval Genre: Canso Numero: IV

Chansoneta farai vencut

I	1	Chansoneta farai vencut
		Pus vos m'an rendut rozilhos ;
		E sapchatz que nos em cregut,
		Pus no vim vostres companhos,
	5	D'un drut novel don tota gens ressona ;
		Que midons es a semblan de leona.
		Ar sai que·s tocan las peiras d·Alzona,
		Pus premiers pot intrar cel que mais dona.
II		E sitot m'en ai joi avut,
	10	Er en vuelh esser mons e blos,
		Quar no vuelh ab nom de cornut
		Aver l'emperi dels grifos.
		Autra n'am ieu que mais mi gazardona
		Sos gens parlars ques autra m'abandona ;
	15	Qu'enjanatz es qui fals' amor razona,
		E domna falh que·s recre per anona.
III		Mas s'ieu saupes qu'il fos leos,
		Ieu l'agr'avut caval ferran,
		Pus de lieis non es poderos
	20	Hom si non es d'aital semblan.
		Avol soudada a midons receubuda,
		Quar per aver s'es de bon pretz moguda.
		Que s'ieu saupes fos per aver venguda,
		Ma soudada ne pogr' aver avuda.
IV	25	E fera·l d'autres gazardos
		Que·l pogran valer atrestan ;
		Mas no s'azauta de chansos,
		Ans se va de me rancuran,
		Que ditz que trop la vuelh levar en bruda
	30	E no vol esser tan luenh mentauguda.
		E valgra·l mais en perdos fos ma druda
		Que sa falsa beutat agues venduda.
V		A·n Baut de Foras la coman,
		Que jamais no i vuelh aver part ;
	35	E non i conosc autre dan
		Mas quar en fis mon Audiart.
		Ai, fals escutz! tan leu vos laissatz fendre,
		Qu'om de part vos non auza colp atendre,
		Et ai vos o ben en cor a car vendre :
	40	S'ie·us pugei aut, bas vos farai dissendre.
VI		Ailas! e com muer desiran
		Per la bela que ses mal art
		Es e tan fina ses enjan,
		Qu'anc non amet volpilh bastart ;
	45	E, si·l sieu cors volgues el mieu entendre,
		Totz autre jois fora contra·l mieu mendre.
		E ja d·un bais s·il me volgues estendre,
		No m'en feira tirar ni escoissendre.
VII		Chanso, vai-t-en a mon « plus Lial » rendre
	50	E digas-li qu·ieu sai domna a vendre.