Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 406,035 Auteur: Raimon de Miraval Genre: Canso Numero: V

Qui bona chanso cossira

I	1	Qui bona chanso cossira
		Non deu tarzar de·l retraire,
		Mas ieu, las ! que sui ples d'ira,
		Cum la poirai bona faire !
	5	Pero no m'es avejaire,
		Si tot jois d'amor me tira,
		Cum que·l meu pensat s'albira,
		Fes avol son ni mot vaire.
II		Quar ben conosc qu'ieu falhira,
	10	Ges encaras non a gaire,
		Que mon bon esper mentira,
		Tant era fals e trichaire ;
		Mas eras me sent pecaire
		Per foi d'amor que m'espira,
	15	Que d'enjan a far se vira
		Mos cors e sui fis amaire.
III		Per un joi que m'alezera,
		Estau en bon'aventura ;
		E quar a totz jorns esmera
	20	La bel' on mos cors s'atura,
		E sitot me desmesura,
		Ges de leis no part m'espera,
		Ans combat ab quers de cera
		Bastimens de peira dura.
IV	25	Tant es bona, fin'e vera,
		Franqu'e de gentil natura
		Que Dieus quan leis fetz no fera
		Mais tan bela creatura,
		Ni non fa d'aital figura,
	30	Ni tant no s·i alezera :
		Quar la nuech on plus s'assera,
		Resplandis la cambra escura.
V		Manhtas vetz ai en pessatge,
		Tan m'es de bela companha,
	35	Qu'ieu li disses mon coratge,
		Tro que m'albir que remanha
		E que dobles mon damnatge ;
		Pero s'ieu pert per folatge,
		Ma domna res no gazanha.
VI	40	« Cabaretz », Dieus me contranha
		Si non avetz dous estatge
		E trop plus ric senhoratge
		Que l'emperi d'Alamanha.