Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Témoignage
* Traductions
* Images

Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 066,002 Auteur: Bernart de Rovenac Genre: Sirventes Numero:

D'un sirventes m'es grans volontatz preza

I 1 D'un sirventes m'es grans volontatz preza
    Rics omes flacs, e no sai que·us disses ;
    Quar ja lauzor no i auria ben meza,
    Ni·us aus blasmar, e val pauc sirventes
  5 Que lauza quan blasmar deuria.
    Pero sitot vos par follia
    A me platz mais que·us blasme dizen ver
    Que si menten vos dizia plazer.
     
II   Amdos los reis an una cauz'empreza
  10 Selh d'Arago et aisselh dels Engles,
    Que no sia per elhs terra defeza
    Ni fasson mal ad ome que·l lur fes ;
    E fan merce e cortezia,
    Quar al rei que conquer Suria
  15 Laisson en patz lor fieus del tot tener.
    Nostre Senher lor en deu grat saber.
     
III   Vergonha·m pren, quant una gens conqueza
    Nos ten aissi totz vencutz e conques,
    E deur'esser aitals vergonha preza
  20 Quom a mi pren al rei aragonés
    Et al rei que pert Normandia.
    Mas prezan aital companhia
    Que ja nulh temps no fasson lur dever,
    Et anc no·n vitz autra tan ben tener.
     
IV 25 E pus no pren en la leuda torneza
    Qu'a Monpeslier li tollon siei borzes,
    Ni no i·s venja de l'anta que i a preza,
    Ja no·l sia mais retragz Carcasses,
    Pos als sieus eis no·s defendria
  30 Assatz fa sol qu'en patz estia.
    Patz non a ges senher ab gran poder,
    Quan sas antas torna a non chaler.
     
V   Ges trop lauzar, quan valors es malmeza,
    Non apel patz, quar mala guerra es.
  35 Ni ja per me non er per patz enteza,
    Mielhs deuri' aver nom gauch de pages
    E dels rics que perdon tot dia
    Pretz, e ja fort greu no lur sia ;
    Quar pauc perdon e pauc lur deu doler,
  40 Quar ges de pauc non pot om trop mover.
     
VI   Lo reis N'Amfos a laissat cobezeza
    Als autres reis, qu'a sos ops no·n vol ges,
    Et a sa part elh a preza largueza,
    Mal a partit qui reptar l'en volgues.
  45 E dic vos que·m par vïlania
    Qui partis e qui·l mielhs se tria.
    Mas ges per tan non a fag nondever,
    Quar a pres so que·ls no volon aver.
     
VII   Ries malastrucs, s'ieu vos sabia
  50 Lauzor, volontiers la·us diria ;
    Mas no·us pessetz menten mi alezer,
    Que vostre grat no vuelh ni vostr' aver.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI