Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 248,082 Auteur: Guiraut Riquier Genre: Canso Numero: I

Tant m'es plazens le mals d'amor

I	1	Tant m'es plazens le mals d'amor
		Que, si tot say que·m vol aucir,
		No·m vuelh ni·m aus ni·m puesc partir
		De midons ni virar alhor ;
	5	Quar tals es qu'ieu penray honor,
		Si fis lieys aman puesc murir,
		O si·m rete cen tans maior,
		Doncx no·m dey tarzar al servir.
II		Quar plazent m'es so qu'en dezir,
	10	E·l servirs, e·l mals m'an sabor,
		E·m play quan ren puesc far ni dir,
		Que·s tanha en dreg sa valor ;
		E·m play mais, quar lunhs hom folhor
		Non pot dir ni mal ses mentir,
	15	E·m play per so l'afans sufrir,
		Tan que mortz no m'en fay paor.
III		Pero no suy ges ses dolor,
		Mas qui·s vuelha, sal Dieus, m'azir !
		Sol que midons me denh grazir
	20	E·m tenha per so servidor,
		Qu'adoncx sobre·ls ricx de ricor
		Serai manens a mon albir ;
		Qu'er no say qui m'ai per senhor,
		Tant me fal cujars e jauzir.
IV	25	Que folhs ai dig, yeu mi reiruelh ;
		Quar ben say que dos senhors ay :
		Mi dons et amor, de cuy vuelh
		Tener mon cors qu'aissi s'eschay ;
		Quar s'ieu ren far d'avinen sai
	30	Ni dir, de lor ay lo capduelh ;
		Per que lunh vil fag no m'acuelh
		Mon cor que tenon ; de que·m play.
V		Aitant de ben amors m'atray
		Que de mal estar m'en destuelh,
	35	E tant de mal, que no m'en duelh,
		Don crey que deziran murray
		Leys aman tant que m'en dechai.
		Et ab tot suy aitals cum suelh ;
		Quar esper que so que quist lay,
	40	Me torn tot mon fen en vert fuelh.
VI		Doncx ja no guar lo mieu escuelh,
		Merces si·m deu pro tener may,
		Qu'ab amor abaisse l'erguelh,
		Qu'a midons, quar no·m reten sai ;
	45	Qu'als no·l deman ni ges no sai
		Que per tant de pretz s'en despuelh,
		Ni non l'er honors si·m recuelh
		Morts per lieys, mas ieu la·i penray.
VII		A·n Bernat d'Olargue t'en vai,
	50	Qu'a de saber razits e bruelh,
		Chanso, mas d'en Bertran no·m tuelh
		D'Opian lauzar, quan poiray.
VIII		Mos Belhs Deportz, tot quant qu'ieu vuelh
		En est mon tant cum vos no·m play.