Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 248,047 Auteur: Guiraut Riquier Genre: Vers Numero: V

Kalenda de mes caut ni freg

I	1	Kalenda de mes caut ni freg
		Ni de temprat, quan paron flor,
		Per Midons cuy fis esser deg,
		No·m fa chantar de fin' amor :
	5	Ans chan, totas sazos, que·m platz,
		Qu'ilh es, don suy enamoratz,
		Gensers e·l mielhers que anc fos,
		Et esper, que·m tengua joyos ;
		Mas ges s'amors pro no·m destrenh.
II	10	Mas ges s'amors pro no·m destrenh
		Quar vils faitz me ten cossiros ;
		Que, qui de mi dons vol mantenh,
		No·l deu esser malsaboros ;
		Quar anc per lieys no fon pessatz,
	15	Et quan cossir sas grans bontatz
		Ab auta singular honor,
		E·m pes que·m vol per servidor,
		Fort dey tener mon cor destreg.
III		Fort dey tener mon cor destreg
	20	Ab sen, que volers ab folhor
		No·m fassa falhir per lanh pleg
		Endreg la belha qu'ieu ador ;
		Quar manens de totas rictatz
		Serai, si suy per lieys amatz ;
	25	Don ben dey esser poderos
		De mon cor, quan er volontos
		De lunh desavinen captenh.
IV		De lunh desavinen captenh
		No·m deu dar poder ma razos
	30	A mon cor, ans tanh que l'essenh
		A dezirar faitz belhs e bos ;
		Quar per bos faitz es hom honratz
		E grazitz e ricx e prezatz,
		E tanhon a fin amador ;
	35	E donc pus ieu am la melhor,
		Be·m covenon tug fach adreg.
V		Be·m covenon tug fach adreg,
		Pus ai esper el joy aussor
		Esser per la valen, qu'endreg
	40	Qu'ilh val, non pot hom dir lauzor ;
		Quar flors es de totas beutatz,
		E de totz bes l'es poders datz,
		E sos noms qu'es mout gracios,
		E crey que lials es e pros
	45	totz hom qu'en grat de midons renh.
VI		Totz hom qu'en grat de midons renh,
		Es apres de faitz cabalos
		Ab vertat ; que de re nos fenh,
		Ni blandis sos contrarios,
	50	Ni pot esser per elhs sobratz ;
		E si·l puesc esser pro privatz
		Be·m montara en gran ricor ;
		Doncx no·m deu far entendr' alhor
		Kalenda de mes caut ni freg.
VII	55	Midons pregue selh qu'es pregatz
		De totz los fis enamoratz,
		Que·m fassa veray amador ;
		Qu'estiers suy tals per ma folhor,
		Que no y vuelh ajuda de dreg.