Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Code: 026a,I Auteur: Arnaut de Carcassès Genre: Novas Numero:

LA NOUVELLE DU PERROQUET

1	Dins un verdier de mur serat,
	A l'ombra d'un laurier folhat,
	Auzi contendr' un papagay
	De tal razo com ye·us dirai.
5	Denant una don' es vengutz
	E aporta·l de lonh salutz
	E a·l dig : « Dona, Dieus vos sal,
	Messatge soy, no·us sapcha mal
	Si·vos dic per que soy aissi
10	Vengutz a vos en est jardi.
	Lo mielher cavayer c'anc fos,
	E·l pus azautz e·l pus joyos,
	Antiphanor, lo filhs del rey,
	Que bastit per vos lo torney,
15	Vos tramet salutz cen mil vetz
	E prega·us per mi que l'ametz,
	Car senes vos no pot guerir
	Del mal d'amor que·l fay languir,
	E nuilhs metges no·ilh pot valer
20	Mas vos que l'avetz en poder.
	Vos lo podetz guerir, si·us platz ;
	— Sol que per mi li trametatz
	Joya que·l port per vostr' amor
	L'auretz estort de sa dolor.
25	Encara·us dic mays, per ma fe,
	per que·l devetz aver merce :
	Car si·us play, morir vol per vos
	Mays que d'autra viure joyos. »
	Ab tan la dona li respon
30	E a li dig : « Amic, e don
	Sai·es vengutz e que sercatz ?
	Trop me paretz enrazonatz ;
	Car anc auzetz dir que dones,
	joya ni que la prezentes
35	A degun home crestia ;
	Trop vos es debatutz en va.
	Mas car vos vey tan prezentier,
	Podetz a mi, en sest verdier,
	parlar o dir so que volres,
40	Que no y seretz forsatz ni pres.
	E peza·m per amor de vos,
	Car es tan azautz ni tan pros,
	Car m'auzetz dar aital cosselh. » —
	« Dona, et ieu m'en meravelh
45	Car vos de bon cor non l'amatz. » —
	— « Papagay, be vuelh que sapiatz
	Qu'eu am del mon lo pus aibit. »
	« E vos cal, dona ? » — « Mo marit. »
	« Jes del marit non es razos
50	Que sia del tot poderos :
	Amar lo podetz a prezen ;
	Apres devetz seladamen
	Amar aquel que mor aman
	Per vostr' amor, ses tot enjan. »
55	« Papagay, trop es bels parliers ;
	Par me, si fossetz cavayers,
	Que jen saupratz dona preiar.
	Mas jes per tan non vuelh laissar
	Qu'eu no·us deman per cal razo
60	Dey far contr' aissel trassio
	A cuy ay plevida ma fe. » —
	— « Dona, so vos dirai yeu be :
	Amors non gara sagramen,
	La volontatz sec lo talen. » —
65	— « Vos be dizetz, si Dieus m'aiut,
	Ab tan vos ai yeu doncx vencut,
	Qu'ieu am mo marit may que re
	Que si'el mon, de bona fe,
	E lunh autr' amador no vuelh.
70	Com auzatz dir aital erguelh
	Qu'ieu am la on mos cors non es ? »
	« Dona, erguelh non dic yeu ges ;
	Par me que·us vulhatz corrossar.
	Pero si·m voletz escotar,
75	Ja per razo no·us defendretz
	D'Antiphanor que non l'ametz.
	Be·us dic que dreitz es veramen
	Que devetz amar a prezen
	Vostre marit mays qu'autra re ;
80	Apres devetz aver merce
	D'aissel que mor per vostr'amor.
	No vos membra de Blancaflor
	C'amet Floris ses tot enjan,
	Ni d'Izeut que amet Tristan,
85	Ni de Tisbe cant al pertus
	Anet parlar ab Piramus,
	C’anc nulhs hom no l·en poc tornar ?
	En lieys vos podetz remirar.
	Cal pro·y auretz s'Antiphanor
90	Languis per vostr' amor ni mor ?
	Lo dieus d'amor e sas vertutz
	Say que vo·n rendran mals salutz,
	Et yeu meteys, que dezir n·ay
	De vos tot lo mal que poirai,
95	— S'en breu d'ora no m'autreyatz
	Que s'el vos ama vos l'amatz. »
	« Papagay, si Dieus m'acosselh,
	Encara·us dic que·m meravelh,
	Car vos tan gen sabetz parlar.
100	E pus tant me voletz preiar
	D'Antiphanor, vostre senhor,
	ieu vos reclam, pel dieu d'amor,
	Anatz vos en, que trop estatz,
	E pregui vos que li digatz
105	Qu'eu m'acordaray en breumen
	E ïlh mostraray tot mon talen.
	E si tant es que m vuelh' amar
	D'aitan lo podetz conortar,
	Que pels vostres precx l'amarai
110	E ja de luy no·m partiray.
	E portatz li 'm aquest anel,
	Qu'el mon non cug n'aya pus bel,
	Ab sest cordo ab aur obrat,
	Que·l prengua per ma amistat.
115	E gardatz vos que non estetz :
	En sest verdier m'atrobaretz. »
	Ab tan lo papagays respon :
	« Dona, fay·s el, si Dieus be·m don
	Mot a aisi azaut prezen,
120	Et yeu portar l'ay veramen ;
	E car avetz tan bel esgart,
	Saludar l'ay de vostra part.
	Dona, sel Dieus que no mentic
	Vos do d'Antiphanor amic,
125	E·m lays vezer c'abans d'un an
	L'ames de cor ses tot enjan. »
	Ab tan parton lor parlamen.
	De layns, car ac gran talen
	De la don'e d'Antiphanor,
130	Del vergier joyos, sest demor,
	Dreg a son senhor es vengutz
	E conta·l com s'es captengutz :
	Premeiramen l·a comensat
	Lo gran pretz e la gran beutat
135	De la domna, si m'aiut fes ;
	E d'aisso a fait que cortes.
	Pueys li a dig. « Senher, ja mays
	Non er noiritz tals papagays,
	Que tan digua per son senhor
140	Com yeu ay dig per vostr' amor.
	Dins el verdier m'aney suau :
	No volia qu'en mon esclau
	Se pogues metre nulha res ;
	May volri' esser soutz que pres.
145	La dona trobey veramen,
	De vostr' amor li fi prezen,
	E tramet vos aquest anel
	Qu'el mon non cug n'aya pus bel.
	Ab sest cordo ab aur obrat,
150	Que·l prendatz per sa amistat.
	E prendetz lo per su' amor
	Que Dieus vo·n do be et honor.
	Mas jes no say per cal razo
	Non prenguam sonh ni ochaizo
155	Que puscam el verdier intrar :
	Jes no vos en say cosselhar.
	Mas yeu metrai foc a la tor
	Et al solier, per vostr' amor;
	E can lo focs er abrassatz,
160	Poiretz intrar per esperatz,
	Ab vostra dona domnejar
	E lieys tener et abrassar. »
	Antiphanor respon breumen :
	« Tornatz premier al parlamen
165	A lieys parlar, si a vos platz :
	Doncx sestas razos li mostratz. »
	Ab tan parto s'en ambeduy.
	— Mot es lo papagays vas luy
	fizels amicx e ses enjan.
170	Vas lo verdier s'en vay volan.
	La dona trobet sotz un pi,
	Saludet la en son lati :
	« Dona, aisel Dieus que vos fetz
	Vos done so que mays voletz
175	E'us gar de mal e d'encombrier,
	Sol que lo vostre cavayer
	Vulhatz amar tan lialmen
	Com el fay vos ses falhimen. »
	« — Papagay, si m'acosselh Dieus,
180	Si trastotz lo mons era mieus,
	tot lo daria de bon cor
	per l'amistat d'Antiphanor.
	Mas aquest verdier es trop claus
	E las gardas non an repaus,
185	Devo velhar tro al mati
	Car lunha nueg non prendo fi. »
	« Dona, e no·y sabetz cosselh ?
	ieu no, e no m'en meravelh,
	si vos cosselh non y sabetz. »
190	« Si fas, dona : ar' m'entendetz.
	ieu tornaray vas mo senhor
	C'ay laissat cossiros d'amor,
	Encar' anueg l'en menaray...
	Al pe del mur l·en aduray.
195	Fuoc grezesc portaray, si·us play,
	ab que metray fuoc al cloquier
	Et a la tor e al solier.
	E cant lo focs sera enpres,
	Ilh y corran tug demanes,
200	Que·l voldran per fort escantir.
	E vos no metatz lonc albir :
	Pessatz de luy e faitz l·intrar;
	Adoncx poiretz ab luy parlar.
	E s'aquest cosselhs vos par bos,
205	Ab mal grat qu'en aya·l gïlos
	Poiretz ab luy aver delieg
	E jazer ab el en un lieg. »
	Ab tan la dona ditz : « Platz me
	Et anatz lo querre desse. »
210	Ab tan lo papagays vay s'en
	vas Antiphanor, que l'aten.
	Sobre son caval l'a trobat,
	de son garnimen adobat ;
	Elm et ausberg viest sobre si
215	E caussas de fer atressi ;
	Sos esperos d'aur tenc caussatz,
	s'espaza sencha a son latz.
	E·l papagays li venc denan.
	« Senher, fay·s el, al mieu semblan
220	Anueg veiretz aisela re
	Que may amatz per bona fe.
	Vostra dona·us manda per mi
	C'anetz vas lieys tot dreg cami.
	Viatz e cavalguatz suau :
225	Lunhs hom no sapcha vostr' esclau,
	ni lunha res, ses devinar,
	No puesca saber vostr' afar.
	Mas foc grezesc nos fay mestier
	En ola de fer o d'assier ;
230	ieu l'empenray entra mos pes ;
	Faitz me·l liurar tost et ades. »
	Antiphanor isnelamen
	li·n fay liurar a son talen.
	Tan cavalguero per viguor
235	Que la nueg foro prop la tor.
	Las gaitas sono pel cloquier,
	L'una va e l'autra l'enquier.
	Devo velhar tro al mati,
	car lunha nueg no prendran fi,
240	— Ab tan Antiphanor dissen
	Et a pauzat son garnimen
	De pres son caval, tot entier.
	Mas solamen son bran d'assier
	Que volc portar senh a son latz;
245	E no l'es ops, d'aisso·m crezatz,
	Car ses temensa, ab cor segur,
	Es vengutz tro al pe del mur.
	E·l papagays de l'autra part
	Intr' el verdier, car trop l·es tart
250	de metre foc, car so senhor
	Laisset tot sol senes paor.
	Denan la dona venc premiers ;
	Aisi com si fos esparviers
	s'anet pauzar denan sos pes,
255	E pueys l'a dig tot en apres :
	« Dona, mo senhor ay laissat
	Al portal maior dezarmat.
	Pessatz de luy e faitz l'intrar,
	qu·ieu vauc lo castel abrandar. »
260	« Papagay, per mon essien,
	Fag n'ay ieu tot l'assermamen.
	Las claus del castel ai pres mi :
	Vec las vos sus aquest coissi.
	Anatz metre foc al castel !
265	Anc may no cug per lunh auzel
	Fos aitan ricx faitz assaiatz,
	Com aquest er, ni comensatz.
	E·l papagays seladamen...
	de las la tor prop del terrier
270	Lor vay metre foc al solier...
	De vas quatre locx s'es empres,
	E·l critz se leva demanes :
	A foc ! Crido per cominal.
	E la dona venc al portal
275	E a ubert senes comjat
	De las gachas e mal lor grat.
	Antiphanor intr' el vergier :
	En un lieg dejos un laurier
	Ab sa dona s'anet colcar.
280	E lunhs homs non o sap contar
	Lo gaug que fo entre los dos,
	Cal pus fo de l'autre joyos.
	Veiaire lor es, so m'es vis,
	C'aquo sia lor paradis ;
285	grans gaugz es entre lor mesclatz.
	E·l focs fo tost azamortatz,
	Ab vinagre·l fan escantir.
	E·l papagays cuget morir
	Tal paor ac de son senhor.
290	A l'enans que poc, venc vas lor
	E es se prop del lieg pauzatz
	E a lor dig : « Car no·us levatz ?
	Anatz sus e departetz vos,
	Que·l focs es mortz tot ad estros. »
295	Antiphanor ab cor marrit
	S'es levatz e pueys li a dit :
	« Dona, que·m voldretz vos mandar ?
	« Senher, que·us vulhatz esforsar
	De far que pros tan can poiretz
300	En est segle tan can viuretz — »
	Fay se vas el, baiza·l tres vetz.
	Antiphanor s'en torna leu
	Com filhs de rey ab son corrieu.
	So dis n'Arnautz de Carcasses
305	Que precx a faitz per mantas res
	E per los maritz castiar
	Que volo lors molhers garar,
	Que·ls laisso a lor pes anar,
	…….. que may valra,
310	E ja degus no·y falhira.