Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,012 Auteur: Folquet de Marseilla Genre: Canso Numero: XXIII

Ja non volgra q’ hom auzis

I	1	Ja non volgra q’ hom auzis
		los dousz chans dels aucellos
		mas cill qi son amoros,
		qe res tan no m’esbaudis
	5	co·ill aucellet per la plaigna
		e·ill bella cui soi aclis :
		cella·m plasz mais qe chanco
		volta ne lais de Bretaigna.
II		Be m’agrada e m’abellis,
	10	mais no soi aventuros,
		q’ades es hom cobeitos
		de cho q’es plus grieu conqis ;
		donch qe·m val ni qe·m gazaigna
		s’ieu l’am e ill no·m grazis !
	15	Amarai donch en perdos ?
		oc ieu, anceis que remaigna.
III		Be m’estera s’ades vis
		lo sieu bel cors, gai, joios ;
		e quan no vei sas faichos,
	20	si be·m soi en mon pais,
		cug esser loing en Espaigna,
		preon· entre Sarrazis ;
		sol lo vezer m’en es bos,
		q’ als non aus dir que re·m taigna.
IV	25	Ferms soi eu be, qar soi fis ;
		qe s’ieu foss fals ne ginhos
		ieu n’hagra pro conpaignos,
		mais sa beltatz e·l dolz ris
		mi tolon de lor bargaigna ;
	30	qar ill val tan, cho·us plevis,
		qe si sol merces i fos
		ren als no es qi·m soffraigna.
V		Be volgra qe Limozis
		fos plus prop de Mauretaigna,
	35	per cho qe plus sove vis
		lo seinhor q’es larcs e pros
		e tan de bona conpaigna.