Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 012b,001 Auteur: Alberjat Genre: Tenso Numero: 1

Gaudi, de donzella m'agrat

I	1	Gaudi, de donzella m'agrat
		Mais qe de domn'e ha·i razon;
		Qe de donzella fas mon pron.
		E domna·m cuj'aver comprat,
	5	Si·m parl’una vetz la setmana;
		Mas donzella m'es plus humana,
		Plus humils, plus obedienz
		Per far totz mos comandamenz
		Qe monegue a son abat.
II	10	N'Albertet, be·us avetz pensat
		Qals es de meins de mession,
		Per qe donzela vos sap bon
		Et avez domna refugat!
		Qe ben sabetz q'om per vilana
	15	No fai gran bruit ni gran ufana;
		Mas per pros domnas conoiscens
		Fai hom rics dos e conduitz gens
		Per q'aital Amors nos a dat.
III		Gaudi, maintas me n'an trichat,
	20	Per q'ieu mais a domna no·m don,
		E non per nuill'autr'ochaizon ;
		Qe tostemps ai mes e donat.
		Mas donzel'am, qar m'es certana,
		Qan la trop, grasseta ni plana,
	25	E vos, q'es d'amor conoissens,
		Per domna metatz tan domentz
		Qon l'avetz tant gent acesmat!
IV		N'Albertet, anc no vi buzat
		Gruer, et hai lo vist, falcon
	30	Ni anc sa costuma no·n fon,
		Per q'a vos non er ja blasmat,
		S'amatz la donzella bazana
		Mais c'una richa castellana;
		Q'aitals es vostres chauzimentz.
	35	Qe l'aiatz; qar etz d'avols gentz
		Qe no·us taign domna d'aut barat !