Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 027,002 Auteur: Arnaut Catalan Genre: Canso Numero: 5

Als entendens de chantar

I	1	Als entendens de chantar
		Ai fach un novelh chantar
		E sapchatz qu'ieu non chantera;
		Mas midons vol qu'ieu chant era
	5	E, pus que mon chantar ai
		Fach, ieu eis lo·m chantarai
		E vos, chantador, chantatz
		Qu'ieu chan, qui sui enchantatz.
II		Dreitz fora, qui ben chantes,
	10	C'autrui chan non deschantes.
		Mas lo mieu no tem deschan,
		S'om no·i met dels motz del chan,
		E nuils hom be no deschanta,
		S'en la rima, en c'om chanta,
	15	Non era faitz lo deschans,
		Per qu'es ben segurs mos chans.
III		E sol midons, qu'ieu tant am
		Et amarai, no·m dezam,
		Pauc tem autra dezamor;
	20	Qu'ieu l'am tan per fin'amor
		Que, quan me dezamaria,
		Ieu ab tot si l'amaria.
		Mais l'amaria amatz,
		Cent aitans que dezamatz.
IV	25	E, s'ieu sui amatz amans,
		Riex soi, qu'ieu puesc dir a mans
		Qu'ill sap los crois dezamar
		E·ls pros ad honor amar;
		E s'ilh per merce m'amava,
	30	Si ja pueis mi dezamava,
		Al mieu tort mais no m'ames
		Nulh temps, ans mi dezames!
V		Mielhs sap dir e far plazer
		Que ricx malvais desplazer;
	35	Qu'ilh es als adreitz plazens
		Et als malvais desplazens.
		Et a cui que pretz desplaia,
		A lieis plaz e tanh que·l plaia;
		Tan platz q'us dels sieus plazers
	40	Tolria mil desplazers.