Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 448,001 Auteur: Uc Genre: Sirventes Numero: 5c

Dalfin, pos tan avez apres

I	1	Dalfin, pos tan avez apres
		De mi q'esser podez cortes
		De chantar e de doneiar
		E disez qe·m voill oblidar,
	5	Qar vos seri'honors e bes,
		Mas eu puos be ses aitals res
		A mas bonas dichas passar?
II		E car no·us puos plus enseignar,
		Be·m deuriaz creire d'amar
	10	Del chausir que·us a premer mes
		La bona domn'e·l druz cortes.
		Q'aqui no·n fai res a doptar;
		C'amors es — q'om no·n deu celar —
		Don es iraz toz lo paes.
III	15	E can lo bons druz a enques
		La tozeta, cuidaz que·il pes,
		Can li laissara gazaignar
		Avol joven, en prez montar?
		E can jovenz a prez conques,
	20	El sab ben que·l meilz a reques
		D'amor e no·n pot plus ausar.
IV		E can bona domna vol far
		Bel toset valer e prezar,
		Aiso es amors e merces,
	25	Can l'en mont'el prez, on ill es,
		E sap tan sas valors honrar
		Que poing de valor far estar
		Lo toset, que no fora ges.
V		E can bels tosets de joi ples
	30	Ama bella tos'a cor fres,
		Ant bon'amor senz tot esgar
		Aitan con chascuns ten son par ;
		Mas leu son faillit e mespres
		E s'es frevols e cas lor fres,
	35	Se l'uns no·n sap l'altre gardar.
VI		Eu fui jovenz al comensar
		Es amei joven fin e clar
		E sai tan de las altras res
		Que juges en soi e plaides,
	40	E·us dic, e pois o ben mostrar,
		Qe prez e valors deu formar
		Amor e totas autras res !