Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,006 Auteur: Bonifaci Calvo Genre: Canso Numero: II

Finz e lejals mi sui mes

I	1	Finz e lejals mi sui mes,
		domna, el vostre poder,
		e·us voill amar e temer
		e blandir, car m'a conques
	5	vostra douza captenenza
		e·l vostre genz cors honratz,
		de que·m sui enamoratz
		de corteza benvolenza.
II		Nuill'autra dompna no·m platz
	10	taut qan, ni amar pogues
		mas vos sola, douza res,
		a cui del tot mi sui datz;
		et ab aital covinenza
		voill que·m deiatz retener,
	15	domna, s'o deingnatz voler,
		pois c'autr'amar no·m agenza.
III		El vostre gran sen esper
		qu'eu non serai so anatz,
		per que·us servirai em patz
	20	taut qant aurai de saber,
		de sen e de conoissenza;
		e sol que·m vailla merces,
		vas vos non er iois ni es,
		que·l meus non sobr' e non venza.
IV	25	Per qu'eu de ren als no·m pes,
		mas de far vostre plazer,
		e prec vos c'al chaptener
		voillatz gardar e non ges
		al parage, car temenza
	30	mi fai zo, que·us me·n sobratz;
		on plus fort mi conortatz
		ab la vostr'umil parvenza.
V		Pero non tem tant, q'assatz
		no·m conort la bona fes,
	35	qu'eu ai els respos cortes
		c'alegramenz mi donatz;
		mas no i ai tant de plivenza
		qu'estei ses temenz'aver,
		car ai mes, al meu parer,
	40	en trop haut luec m'entendenza.