Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,016 Auteur: Bonifaci Calvo Genre: Sirventes Numero: XI

Una gran desmezura vei caber

I	1	Una gran desmezura vei caber
		entre las genz, qu'eu non posc ges soffrir:
		que s'om mezave fazen son dever,
		es encolpatz e repres de faillir;
	5	et autra·n vei caber, que plus grieus m'es,
		que s'om gazaingn'aver ab faillimen
		dizon de lui qu'el es valenz e pros
		e qu'el sab far sos faitz saviamen.
II		E faill trop grieu totz hom, al mieu parer,
	10	qui blasma celui que·s vol enantir
		ab ben far, tost lo veja dechazer;
		e plus grieu faill aquel, al mieu albir,
		que lauza cellui, q'aura pres granz bes
		e maint aver gazaingnat malamen:
	15	c'aisso fai de ben far giquir los bos,
		e·ls malvatz faillir plus ardidamen.
III		E si chascus gardes al captener
		e lauzes celui que·l vis far e dir
		bontat e sen, qom qe·l fos de l'aver,
	20	e·l volgues honrar e gent acuillir,
		e·l croi malvatz, que gran ricor agues
		gazaingnada mal et aunidamen,
		blasmeson tuig e mal acuillitz fos,
		grieu seri'om d'avol chaptenemen.
IV	25	Mas aisso·m fai gran meravill'aver,
		qu'a chascun vei plazer e abellir
		bonz faitz et em paraulas mantener,
		e·ls crois blasmar et a despieg tener
		e nuls de ben far no·s trebailla ges,
	30	ni de mal far no·s garda, ni·s repen.
		Mas ieu m'albir, gardan totas razos,
		que peccatz es qe las genz sobrepren.
V		Per qu'eu vas los granz seingnors, que poder
		an de ben far sobre·ls autres, me vir
	35	e los prec fort qu'il non deian voler
		tan gran mal del segle, ni consentir,
		e que per els conseills i sia pres,
		e podon i conseill penre leumen,
		c'ab sol mostrar que lor si'enuios,
	40	tuit li autre lo·n gitaran breumen.
VI		Reis castellanz, per vos non o dic ges,
		car totz mals vos enueia trop fortmen,
		e·l bes vos plai tant fort que sol per vos
		esperon tuit q'aion revinimen.