Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,008 Auteur: Bonifaci Calvo Genre: Canso Numero: XIV

Lo maier senz, c'om en se puosc'aver

I	1	Lo maier senz, c'om en se puosc'aver
		es saber far qu'aia luec sa valors,
		car ges estiers non pot far per qu'el sia
		pros, ni prezatz, ni grazitz, ni honratz.
	5	Per que·m sui trop folamenz capdellatz,
		car en servir leis, que non entendia
		que mos servirs li fos pretz ni honors,
		mescabei tant, qu'era·m fai trop doler.
II		E s'ieu anc iorn mis tant a nonchaler
	10	mon sen, qu'en luec mi pogues metr'amors
		on no·m valgues amar senes bauzia
		ni genz servirs, ben me·n sui chastiatz.
		E s'ieu com fols ai estat malmenatz,
		non se·n pretz mais cil qu'en vil mi tenia,
	15	car ab mo sen revenrai tost aillors:
		don valra meinz, car no·m saup retener.
III		Car eu, que suoill sa beutat, son valer
		e son pretz enantir mest los meillors,
		me·n giquirai, car piegz far no·ill poiria;
	20	e s'ieu pogues, no i es ma voluntatz,
		car ieu vas ren non dei esser iratz
		mas vas mon cor, que·m mes en la fullia,
		don mi reman perda et desonors:
		per qu'eu l'azir tant fort com n'ai poder.
IV	25	E iamais non farai a son voler,
		de creire hoeils, ni senblanz trichadors,
		car cel es fols qui per fol cor se guia;
		mas cant mos cors er ben dregz e senatz,
		adonc volrai per lui esser guiatz.
	30	Pero el ben oimais saber deuria
		cal frug sap far leuiari'e follors
		e cal pretz n'a qui las vol mantener.
V		Per qu'eu oimais de lui bos faitz esper,
		e voil ab lui quer'aiud'e socors
	35	az Amor, car senes leis non sabria
		viure iauzenz, tant mi platz s'amistatz!
		Car d'Amor mou deportz, chanz e solatz
		valors verai'e tota cortezia:
		per c'om deu contar mest los sordeiors
	40	totz cels que puinhon en leis dechazer.