Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,012 Auteur: Bonifaci Calvo Genre: Planh Numero: XVI

S 'ieu ai perdut, no se·n podon iauzir

I	1	S 'ieu ai perdut, no se·n podon iauzir
		mei enemic, ni hom que be no·m vueilla,
		car ma perda es razos qu'a els dueilla
		tan coralmenz, que·s deurian aucir,
	5	e totz lo monz aucire si deuria,
		car morta es midonz, per cui valia
		pretz e valors; e s'eu, chaitius, saupes
		chauzir tal mort, que piegz far mi pogues
		que ma vida, senz tardar m'auciria.
II	10	E car non posc peiurar ab murir,
		mi lais viure tant trist, que flors ni fueilla
		ni nuls deportz non a poder que·m tueilla
		ren del dolor, que·m fai metr' en azir
		tot zo que mais abellir mi solia,
	15	car despiegz mi capdell'e ira·m guia
		e·m met en luec, on no viuria res,
		mas ieu, qu' ai tant de mal suffrir apres,
		qu'eu viu d'aisso, don totz autr'om morria.
III		E viu tan grieu, qu'eu no·m posc ges soffrir,
	20	que plors non semen e dols non recueilla
		per la mort de la bella, que·m despueilla
		de tot conort; pero eu non dezir
		aver poder, ni voler, nueg ni dia,
		de mi loingnar del maltrag que·m languia,
	25	pois c'a Dieu plac que mortz cellam tolgues
		dont venia Lotz mos gaugz e mos bes
		e tot cant ieu d'avinen far sabia.
IV		Tant er'adreich'en tot ben far e dir,
		qu'eu non prec Dieu qu'en paradis l'acueilla,
	30	quar, per paor q'aia ni aver sueilla
		qu'el l'aia mes en soan, non sospir
		ni plaing, car, al mieu senblan, non seria
		lo paradis gent complitz de coindia
		senz leis; per qu'eu non tem ni dupti ges
	35	que Dieus non l'ai'ab se lai on el es,
		ni·m plaing mas, car sui loing de sa paria.
V		Fols mi par cel que cor met ni consir
		el ioi del mon, e plus fols qui s'orgueilla
		per tal ioi, car autr'uichaizos non mueilla
	40	mon vis de plors, ni als no·m fai languir,
		mas la menbranza del ioi, qu'eu avia
		del bel capteing e de la cortezia
		qu'eu trobav'e mi donz; e s'eu agues
		saubut que tant mal prendre me·n degues,
	45	non prezera·l ioi, ni ar me·n dolria.
VI		Ai, flors de valor e de cortesia
		e de beutat! Ai, bella, douz'amia!
		Si·l mortz complic son voler qan vos pres,
		ieu en remaing tan doloros, que res
	50	alegrar ni conortar no·m poiria.