Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,025 Auteur: Peire Vidal Genre: Canso Numero: I

La lauzet' e·l rossinhol

I	1	La lauzet' e·l rossinhol
		Am mais que nulh autr' auzel,
		Que pel jois del temps novel
		Comenson premier lor chan :
	5	Et eu ad aquel semblan,
		Quan li autre trobador
		Estan mut, eu chan d'amor
		De ma domna Na Vierna.
II		E quar per sa merce·m col,
	10	Qu'en chantan domna l'apel,
		Be·s tanh qu'ab leis mi capdel,
		Qu'eu vos pliu ses tot enjan
		Que seus serai derenan ;
		Quar m'a fait tanta d'onor,
	15	Que·m rete per servidor
		Per totz temps mais Na Vierna.
III		Las ! qu'eras planh so que·m dol
		Plus que nafra de cairel
		No fera ni de coutel ;
	20	Per qu'es fols qui·s vai vanan
		Son joi tro qu'om lo·i deman,
		E domna fai gran folor,
		Que s'enten en gran ricor —
		E Deus gart ne Na Vierna.
IV	25	Ara·m va miels que no sol :
		Quant ieu remir mon anel,
		No vei ciutat ni castel
		Tug non fasson mon coman ;
		E li rei e l'amiran
	30	Me tenon tug per senhor,
		Pel gaug e per la doussor
		Quem ven de vas Na Vierna !