Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,006 Auteur: Peire Vidal Genre: Canso Numero: II

Atressi co·l perilhans

I	1	Atressi co·l perilhans
		Que sus en l'aiga balansa,
		Que non a conort de vida,
		Tan sofre greu escarida,
	5	Que paors li toi membransa,
		E pois quan ven a bon port
		Per astre o per socors :
		Tot aitals astres m'a sors,
		Per qu'eu ai assatz razo
	10	De far novela chanso.
II		Estat aurai malanans
		E sufert greu malanansa,
		Tan que merces m'es falhida
		De leis qu'e son tort m'oblida ;
	15	E no·n aus penre venjansa.
		Pero eu trac peitz de mort,
		Qu'anc no·m volc valer Amors ;
		Mas er s'en va la dolors.
		Qu'en tal ai m'entensio,
	20	Que·l plai qu'eu chant e·l sap bo.
III		De la bela sui clamans,
		Que me mostra per semblansa
		Que ma mortz l'es abelida :
		E quar melhs non es chauzida,
	25	Ai faita mout gran erransa.
		Tornarai l'ir' en conort
		E virarai m'en alhors,
		Quar sens es e grans valors,
		Qui de bran senhor felo
	30	Se lonha ses mal resso.
IV		Aissi·m venquet sos semblans
		Al prim qu'eu vi s'acoindansa,
		Que lauzan l'ai enantida ;
		E trop lauzars es mentida
	35	Maintas vetz senes doptansa.
		Per qu'al repropchier m'acort
		Qu'ai auzit dels ancessors,
		Qu'a temps vens'om vensedors
		E per temps e per sazo
	40	Vencut fan gran vensezo.
V		Fis amics sui ben amans
		Et ai per dreg benenansa ;
		Tan bon'aventura·m guida,
		Que leis qu'a valor complida
	45	M'a mes en bon'esperansa
		E m'a trait de mala sort,
		Si que·l neus mi sembla flors
		E·l glatz jardis e verdors,
		Et ai fag per dreit mon pro
	50	Tan quez enrequitz en so.
VI		Tant avetz bon pretz e fort,
		Bona domna, que valors
		Vos lauza mais que lauzors,
		Per qu'eu retrac ma chanso
	55	Novela ab novel so.
VII		Bona domna, neus de port
		Sembla la vostra blancors,
		E par de roza·l colors ;
		Qu'aiss·us fetz Deus de faisso
	60	Que natura·i pert razo.