Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,023 Auteur: Peire Vidal Genre: Canso Numero: III

Ges del joi que ai no·m rancur

I	1	Ges del joi que ai no·m rancur
		Mas de la dolor sui clamans,
		Que·m fai traire trastotz mos ans
		Ses colp'e ses tort, qu'eu no l'ai.
	5	Mas era·m sui mes en assai,
		Com eu posca retrair'e dir
		Tal re, qu'Amors que·m fai languir
		No mi vol ab dreit capdelar.
II		Tan m'a salvatge cor e dur
	10	Cela que·m bat de sos verjans,
		Qu'on plus li sui humilians,
		Adoncs me dona plus d'esglai.
		Mas eu com fols, quan ven en plai,
		Venh denan lois e no m'azir
	15	De parlar ; e pois me consir,
		Que trop me volh sobrecochar.
III		De clartat m'a mes en escur
		Cela per cui vauc dezirans ;
		E pos Amors vol totz mos dans,
	20	No·m meravilh si mal m'en vai.
		Mas be·us dic que tan sofrirai,
		Tro posca en loc avenir,
		Qu'ab mos olhs son bel cors remir,
		E s'i aura trop al meu par.
IV	25	Non ai castel serrat de mur
		Ni ma terra no val dos gans,
		Mas anc no fo plus fis amans
		De mi, ni es ni er jamai.
		Per qu'eu, bona domna, serai
	30	Vostres, e si·m voletz sofrir
		Qu'eu vos am, no·us quier alre dir,
		Qu'Amors m'a fag sobreparlar.
IV		Ai ! quan poirai cridar : segur !
		Ni quoras serai benanans,
	35	Quant Amors volra mos enans ?
		Qu'autre conselh de mi no sai.
		Qu'Amors me pot gitar d'esmai
		Que m'a fag e fara languir,
		S'ab merce no·m vol recolhir
	40	E l’ira de mon cor gitar.