Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,028 Auteur: Peire Vidal Genre: Canso Numero: V

Mout es bona terr' Espanha

I	1	Mout es bona terr' Espanha
		E·l rei qui senhor en so
		Dous e car e franc e bo
		E de corteza companha ;
	5	E s'i a d'autres baros,
		Mout avinens e mout pros,
		De sen e de conoissensa
		E de faitz e de parvensa,
II		Per que·m platz qu'entr'els remanha
	10	En l'emperial regio,
		Quar ses tota contenso
		Me rete gent e·m gazanha
		Reis emperaires N'Anfos,
		Per cui Jovens es joios,
	15	Quez el mon non a valensa,
		Que sa valors no la vensa.
III		Fag ai l'obra de l'aranha
		E la musa del Breto ;
		Per qu'eu mezeis no sai co
	20	M'en rancur e m'en complanha,
		Que·l ver dir m'es angoissos
		E·l mentirs no m'es nuls pros :
		Daus totas partz trob falhensa
		En la sua benvolensa.
IV	25	Mout m'a tengut en greu lanha,
		Quar l'ai servid' en perdo ;
		E servir ses gazardo
		Crei que captals en sofranha ;
		Que velhs, paubres, sofraitos,
	30	Venc entre·ls rics, vergonhos :
		Per c'om deu cercar garensa,
		Ans que torn' en decazensa.
V		E pos ma domna m'estranha
		De so que no·lh platz que·m do
	35	S'amor, tart veirai Orgo
		Ni·l reial castel d'Albanha.
		E ja tant pauc orgolhos
		Amic ni tant amoros
		Non auran mais part Durensa
	40	En la terra de Proensa.