Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,015 Auteur: Peire Vidal Genre: Canso Numero: VI

Car' amiga douss' e franca

I	1	Car' amiga douss' e franca,
		Covinens, e bel' e bona,
		Mos cors a vos s'abandona,
		Si qu'ab autra no s'estanca.
	5	Per que·us port amor certana
		Ses orgolh e ses ufana,
		E mais dezir vostr'amansa
		Que Lombardia ni Fransa.
II		Quar vos etz arbres e branca
	10	On fruitz de gaug s'assazona:
		Pero qui a vos s'adona
		No tem folzer ni lavanca.
		Quar vostr' amors segurana
		Garis e·m reven e·m sana,
	15	E·m tol enoi e pezansa
		Ab gaug de fin' alegransa
III		Ab color vermelh' e blanc
		Fina beutatz vos faissona
		Ad ops de portar corona
	20	Sus en l'emperial banca.
		E quar etz douss' et humana,
		Teno·us tuit per sobeirana
		De joi e de benestansa
		E de valor e d'onransa.
IV	25	Ges no·s dol de pe ni d'anca
		La bela Na Guilhalmona,
		Ni es falsa ni felona
		Ni no porta soc ni sanca.
		Anc tan gentils ciutadana
	30	No nasquet ni tan doussana,
		Neis la filha Na Constansa,
		Per cui Jovens saut' e dansa.
V		Qu'om no·m poiria ab planca
		Gitar del linh de Narbona :
	35	Quar en tan quan revirona
		Cels, non a saura ni danca
		Tant avinen crestiana
		Ni juzeva ni pagana,
		Que denans totas s'enansa
	40	Vostra covinens semblansa.
VI		Velha rica tenh per manca,
		Quant a poder e no dona
		Et acolh mal e peitz sona ;
		Pretz la meins que s'era ranca.
	45	Mas de gentil Castellana
		Ben fait' ab color de grana
		Ara mais la bon'esperansa
		Que pel froncida ni ransa.
VII		Qui d'En Diego s'arranca,
	50	Non a mestier mas que·s pona
		O qu'om tot viu lo rebona
		En privada pozaranca,
		A lei de checa vilana
		Recrezen, cor de putana,
	55	Sitot al taulat se lansa,
		Ni·s ponha d'emplir sa pansa.