Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,020 Auteur: Peire Vidal Genre: Canso Numero: VIII

En una terra estranha

I	1	En una terra estranha
		Trobei amor privada
		E gen ben ensenhada
		Cui ja Deus no sofranha !
	5	Aitan quant eu dezir ni volh,
		Sal Deus las domnas de Biolh,
		Quar en lor es pretz e valors
		E gaugz e solatz et amors,
		Totas beutatz e totz plazers,
	10	Totz bos sens ,e totz bels sabers
		E Deus pauzet las prop de se,
		Quar vi en elas tan de be.
II		Per que am mais montanha
		Ab neu et ab gelada
	15	Qu'ampla terra ni lada
		Ni ribeira ni planha.
		E non o dic ges per orgolh,
		Mas quar ma domna·m dezacolh,
		Qu'avenhat m'es que·m n'an alhors,
	20	E non cre que·l sia honors.
		Mos maltraitz ni mos dechazers :
		Mas fai aitan de sos volers,
		E pot o far, que ja per re
		No·lh volrai mal, com que·m malme.
III	25	Be·us dic que pauc gazanha
		Qui destrui sa mainada,
		Que cortz non es honrada,
		Des qu'om pros no·i remanha.
		Quar mi part de s'amor, m'en dolh,
	30	Quar tan valens no cre·s despolh,
		Que bel' es sobre las gensors
		Plus que roza sobr' autras flors ;
		Et si·l plagues lo remaners,
		De sai fora·l gratz e·l lezers :
	35	Mas eu parli no sai de que,
		Qu'on mais la prec, peitz s'en capte.
IV		Et ai ben dreg que·m planha
		Si sui perdutz en bada,
		Qu'Amors no·us a tocada,
	40	Mas mi ten en tal lanha,
		De que ploron soven mei olh,
		Si que la car' e·l peitz m'en molh.
		Gran mestier m'en agra socors
		D'amics o de mantenedors,
	45	Quar anc no fon sauput mos vers,
		Si·m ten amezurat temers :
		Tan vos am de cor e de fe,
		Que nulh amic de vos non cre.
V		Quar plus qu'obra d'aranha
	50	Non pot aver durada
		Amors, pos es proada,
		Qu'ab ditz daur' et aplanha
		Tal qu’a·l cor de vilan escolh :
		Per qu'eu fatz d'Aurenja Nantolh,
	55	Que·ls plus cortes vei neis pejors
		Ves domnas e ves amadors.
		Per que val mais bos absteners
		Que fols parlars ; mas bels parers
		Volh far als pros, quan s'esdeve,
	60	Mas del ver tenc l'air' e l'ale.
VI		Domna, Deus qu'es leials e vers
		Vos a dat pretz, honor e be
		Pro mais que no·n retenc ab se.
		Que mainta gens ditz de vos be,
	65	Que lui renega e mescre.