Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,027 Auteur: Peire Vidal Genre: Canso Numero: IX

Mos cors s'alegr' e s'esjau

I	1	Mos cors s'alegr' e s'esjau
		Per lo gentil temps suau
		E pel castel de Fanjau
		Que·m ressembla paradis ;
	5	Qu'amors e jois s'i enclau
		E tôt quant a pretz s'abau
		E domneis verais e fis.
II		Non ai enemic tan brau,
		Si las domnas mi mentau
	10	Ni m'en ditz honor e lau,
		Qu'eu no·l sia bos amis.
		Et quar mest lor non estau,
		Ni en autra terra vau,
		Planh e sospir e languis.
III	15	Mos bels arquiers de Laurac,
		De cui m'abelis e·m pac,
		M'a nafrat de part Galhac
		E son cairel el cor mis ;
		Et anc mais colps tan no·m plac,
	20	Qu'eu sojorne a Saissac
		Ab fraires et ab cozis.
IV		Per totz temps lais Albeges
		E remanh en Carcasses,
		Que·l cavalier son cortes
	25	E las domnas del païs.
		Mas Na Loba a·m si conques,
		Que, si m'ajut Deus ni fes,
		Al cor m'estan sei dous ris.
V		A Deu coman Monrial
	30	E·l palaitz emperial,
		Qu'eu m'en torn sai a'N Barral,
		A cui bos pretz es aclis ;
		E cobrar m'an Proensal,
		Quar nulha gens tan no val,
		Per que serai lor vezis.