Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,007 Auteur: Peire Vidal Genre: Canso Numero: XI

Baros de mon dan covit

I	1	Baros de mon dan covit,
		Fals lauzengiers desleials,
		Qu'en tal domna ai chauzit,
		On es fis pretz naturals.
	5	Et eu am la de fin cor, ses bauzia,
		E sui totz seus, quora qu'ilh sia mia,
		Quar sa beutatz e sa valors pareis,
		Qu'en leis amar fora honratz us reis,
		Per qu'eu sui rics sol que·m denh dire d'oc.
II	10	Que res tan no m'abelit
		Com sos adreitz cors leials,
		On son tug bon aip complit
		E tug ben senes totz mals.
		Pos tot i es quan tanh a drudaria,
	15	Ben sui astrucs, sol que mos cors lai sia ;
		E si merces, per que totz bos aips cries
		Mi val ab leis, be·us posc dir ses tot neis,
		Qu'anc ab amor tant ajudar no·m poc.
III		Chant e solatz vei failhit
	20	Cortz e dos e bels hostals
		E domnei no vei grazit
		Si·lh domn' e·l drutz non es fals
		Aquel n'a mais que plus soven galia,
		Non dirai plus, mas com si volha sia.
	25	Mas peza me quar ades non esteis
		Lo premiers fals que comenset anceis :
		E fora dreitz, qu'avol eissemple moc.
IV		Mon cor sent alegrezit,
		Quar me cobrara·N Barrals.
	30	Ben aja cel que·m noirit
		E Deus ! quar eu sui aitals ;
		Que mil salutz me venon cascun dia
		De Catalonha e de Lombardia,
		Quar a totz jorns poja mos pretz e creis.
	35	Quar per un pauc no mor d'enveja·l reis,
		Quar ab domnas fauc mon trep e mon joc.
V		Ben es proat et auzit
		Com eu sui pros e cabals,
		E pos Deus m'a enriquit,
	40	No·s tanh qu'eu sia venals.
		Cen domnas sai que cascuna·m volria
		Tener ab se, si aver me podia.
		Mas eu sui cel qu'anc no·m gabei ni·m feis
		Ni volgui trop parlar de mi mezeis,
	45	Mas domnas bais e cavaliers desroc.
VI		Maint bon tornei ai partit
		Pels colps qu'eu fier tan mortals,
		Qu'en loc no vau qu'om no crit :
		« So es En Peire Vidals,
	50	Cel qui mante domnei e drudaria
		E fa que pros per amor de s'amia,
		Et ama mais batalhas e torneis
		Que monges patz, e sembla·l malaveis
		Trop sojornar et estar en un loc. »
VII	55	Plus que no pot ses aiga viure·l peis,
		No pot esser ses lauzengier domneis,
		Per qu'amador compron trop car lor joc.