Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,018 Auteur: Peire Vidal Genre: Canso Numero: XIV

Drogoman senher, s'agues bon destrier

I	1	Drogoman senher, s'agues bon destrier,
		En fol plag foran intrat mei guerrier :
		C'aqui mezeis cant hom lor me mentau
		Mi temon plus que caillas esparvier,
	5	E non preson lor vida un denier,
		Tan mi sabon fer e salvatg'e brau.
II		Cant ai vestit mon fort ausberc doblier
		E cent lo bran que·m det en Gui l'autrier,
		La terra crola per aqui on vau ;
	10	E non ai enemic tant sobrancier
		Que tost no·m lais las vias e·l sentier,
		Tan me dopton can senton mon esclau.
III		D'ardimen vail Rollan et Olivier,
		E de domnei Berart de Mondesdier ;
	15	Car soi tan pros, per aco n'ai bon lau,
		Que sovendet m'en venon messatgier
		Ab anel d'aur, ab cordo blanc e nier,
		Ab tals salutz don totz mos cors s'esjau.
IV		En totas res semble ben cavalier ;
	20	Si·m soi, e sai d'amor tot son mestier
		E tot aisso c'a drudari' abau,
		C'anc en cambra non vitz tan plazentier
		Ni ab armas tan mal ni tan sobrier ;
		Don m'ama e·m tem tals que no·m ve ni m'au.
V	25	E s'eu agues caval adreit corsier,
		Suau s'estes lo reis part Balaguier
		E dormis se planamen e suau ;
		Qu'eu·l tengra en patz Proens' e Monpeslier,
		Que raubador ni malvatz rocinier
	30	No·l rauberan mais Autaves ni Crau.
VI		E si·l reis torn' a Tolosa, e·l gravier,
		E n'eis lo coms e siei caitiu dardier,
		Que tot jorn cridon : « Aspa ! et Orsau ! »
		D'aitan me van qu'eu n'aurai·l colp premier,
	35	E i ferrai tan qu'els n'intraran doblier,
		Et eu ab lor, qui la porta no·m clau.
VII		E s'eu consec gelos ni lauzengier
		C'ab fals conselh gaston l'autrui sobrier
		E baisson joi a presen et a frau,
	40	Per ver sabran cal son li colp qu'eu fier :
		Que s'avian cors de fer et d'acier
		No lur valra una pluma de pau.
VIII		Na Vierna, merce de Monpeslier,
		En Rainiers, ar amaretz cavalier,
	45	Don jois m'es mais cregutz per vos, Deu lau.