Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,045 Auteur: Peire Vidal Genre: Canso Numero: XV

Son ben apoderat

I	1	Son ben apoderatz
		Per amor e vencutz,
		Car aital via tenc
		Que lai on ieu plus prenc
	5	D'anta ni d'encombrier
		Torni plus volentier ;
		Per qu'ieu sai qu'es vertatz
		Ques es majer assatz
		Gaugz, quant es car compratz,
	10	C'aicel don es viutatz.
II		Enquer sui plus iratz
		Dels cordons qu'ai perdutz
		Que d'aisso que m'avenc ;
		E pero ges no·m fenc,
	15	Ans sui plus vertadier
		Que no m'agra mestier,
		Qu'enquer par als costatz
		Com ieu fui laig menatz ;
		Pero m'es tot deintatz,
	20	Pois c'a ma dona platz.
III		Donc pueis Mos Castiatz
		Aunis ni rauba drutz,
		No·lh pes s'ieu l'en reprenc :
		Car qui fa qui blastenc
	25	Auzit de repropchier ;
		E car per pauc denier
		Fui en sa cort raubatz,
		Lo blasmes li es restatz ;
		E fora plus onratz
	30	S'eu fos d'el revenjatz.
IV		Cel n'es plus enganatz
		Qui li es d'amor tengutz :
		Qu'al senher de Berenc
		Sai ben com l'esdevenc ;
	35	E pueis lo Pognautier,
		Car guerrejet premier,
		Fo per el desrocatz ;
		E ja totz temps guidatz
		Fo sos amics privatz
	40	Si com l'escaravatz.
V		Per so n'es sos comtatz
		Enrechitz e cregutz ;
		Mas meins val d'un arenc
		So que per fors a renc.
	45	Qu'el pres monge claustrier,
		A cui tolc lo mostier ;
		Pero si n'a raubatz
		Sant Felitz e Mornatz,
		Mas Tripol, so sapchatz,
	50	Fo gent d'el conquistatz.
VI		E·l portals e·l fossatz
		De Fonchau fo fondutz ;
		E pueissas m'en sovenc
		— Que de plus no m'estenc —
	55	Ques a en Forcalquier
		Enemic e guerrier,
		Si que Mos Gazanhatz
		Ten Opida en patz ;
		E si es perdonatz,
	60	Si n'er tortz e pecatz.
VII		Domna, vostra beutatz
		E·l fins pretz mentaugutz
		Mi fai semblar sebenc
		Tot autre joi c'anc venc
	65	De vos ; qu'en alegrier
		Estauc ab cor entier,
		Don n'ai major solatz.
		Ai ! Don', humilitatz
		E pretz e pietatz
	70	Vos met' entre mos bratz.
VIII		Na Vierna, pojatz ;
		Vilas mal enseignatz
		Es qui nos a loignatz
		De nostras amistatz.
IX	75	Per que Mos Castiatz
		S'es per Roma crematz,
		Si·l fai mas es pecatz,
		Pos totz no·i esta ratz.