Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,011 Auteur: Peire Vidal Genre: Canso Numero: XVI

Be·m pac d'ivern e d'estiu

I	1	Be·m pac d'ivern e d'estiu
		E de fretz e de calors,
		Et am neus aitan com flors
		E pro mort mais qu'avol viu :
	5	Qu'enaissi·m ten esforsiu
		E gai Jovens et Amors.
		E quar am domna novela,
		Sobravinen e plus bela,
		Paro·m m rozas entre gel
	10	E clars temps ab trebol cel.
II		Ma domn'a pretz soloriu
		Denan mil combatedors,
		E contra·ls fals fenhedors
		Ten establit Montesquiu :
	15	Per qu'al seu ric senhoriu
		Lauzengiers no pot far cors,
		Que sens e pretz la capdela,
		E quan respon ni apela,
		Sei dig an sabor de mel,
	20	Don sembla Sant Gabriel.
III		E fai·s plus temer de griu
		A vilas domnejadors,
		Et als fis conoissedors
		A solatz tant agradiu,
	25	Qu'al partir quecs jur' e pliu
		Que domn' es de las melhors :
		Per que·m trahin' e·m cembela
		E·m tra·l cor de sotz l'aissela,
		E a·m leial e fizel
	30	E just plus que Deus Abel.
IV		Del ric pretz nominatiu
		Creis tan sa fina valors
		Que no pot sofrir lauzors
		La gran forsa del ver briu.
	35	Sei enemic son caitiu
		E sei amic ric e sors.
		Olh, front, nas, boch' e maissela,
		Blanc peitz ab dura mamela,
		Del talh dels filhs d'Israel
	40	Et es colomba ses fel.
V		Lo cor tenh morn e pensiu,
		Aitan quant estauc alhors ;
		Pois creis m'en gaugz e doussors,
		Quan del seu gen cors m'aiziu.
	45	Qu'aissi com de recaliu
		Ar m'en ve fregz, ar calors ;
		E quar es gai' et isnela
		E de totz mals aibs piucela,
		L'am mais per Sant Raphael,
	50	Que Jacobs no fetz Rachel.
VI		Vers, vai t'en ves Montoliu
		E di m'a las tres serors,
		Que tan mi platz lor amors,
		Qu'ins en mon cor las escriu ;
	55	Ves totas tres m'umiliu
		E·n fatz domnas e senhors.
		E plagra·m mais de Castela
		Una pauca jovensela,
		Que d'aur cargat mil camel
	60	Ab l'emperi Manuel.
VII		Qu'en Fransa et en Beriu
		Et a Peiteu et a Tors
		Quer Nostre Senher socors
		Pels Turcs que·l tenon faidiu,
	65	Car tout l'an los vaus e·l riu
		On anavo·lh pechadors ;
		E totz hom que no·s revella
		Contr'aquesta gen fradella
		Mal me sembla Daniel
	70	Que·l dragon destruis a bel.
VIII		Per Sant Jacme qu'om apela
		L'apostol de Compostela,
		En Luzi' a tal Miquel
		Que·m val mais que cel del cel.
IX	75	Francs reis, Proensa·us apella,
		Qu'en Sancho la·us desclavella,
		Qu'el en trai la cer' e·l mel
		E sai tramet vos lo fel.