Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,029 Auteur: Peire Vidal Genre: Canso Numero: XVII

Mout m'es bon e bel

I	1	Mout m'es bon e bel,
		Quan vei de novel
		La folh' el ramel
		E la fresca flor,
	5	E chanton l'auzel
		Sobre la verdor,
		E·l fin amador
		Son gai per amor.
		Amaires e drutz sui eu,
	10	Mas tan son li maltrag greu
		Qu'eu n'ai sofertz lonjamen,
		Qu'un pauc n'ai camjat mon sen.
II		Pero de bon sen
		Am de bon talen
	15	Amor e joven
		E tot quan m'es bel ;
		Qu'ab joi lonjamen
		Viu e renovel,
		Co·l fruitz el ramel,
	20	Quan chanton l'auzel :
		Qu'e'mon cor ai folh' e flor,
		Que·m ten tot l'an en verdor
		Et en gaug entier, per qu'eu
		No sen re que·m sia greu.
III	25	Quora que·lh fos greu,
		Ara·m te per seu
		La genser sotz Deu
		E del melher sen ;
		Car conois que eu
	30	L'am de bon talen,
		Si qu'en mon joven
		E pois lonjamen
		Servirai lo seu cors bel,
		Gai et adreg e novel,
	35	A lei de fin amador,
		Qu'a tot son cor en amor.
IV		Ben aurai d'amor
		Folh' e fruit e flor
		E ram e verdor,
	40	S'anc res m'en fo greu,
		Que per amador
		Mi ten com lo seu,
		E prec la per Deu
		Qu'ilh esgart com eu
	45	L'aurai estat de bon sen,
		Qu'anc non camjei mon talen,
		Ni non am flor ni ramel,
		Mas per leis ni chan d'auzel.
V		Plus gais que l'auzel
	50	Serai, si l'es bel
		Qu'un dous bais novel
		Me do per amor,
		Qu'anc d'autre ramel
		No volc colhir flor
	55	Ni fruit ni verdor ;
		Ni anc amador
		No vitz qui·s camjes plus greu ;
		E pos ela·m te per seu,
		Servirai l'en mon joven,
	60	Pois velhs, s'eu viu lonjamen.
VI		Mes ai lonjamen
		Mon cor e mon sen
		En far son talen
		Plus qu'en chan d'auzel.
	65	Per leis am joven
		E tot quan l'es bel :
		Qu'aissi·m renovel,
		Co·l fruitz el ramel.
		Quan posc re far per s'amor,
	70	Eu non desir autra flor,
		Mas qu'a leis plassa per Deu,
		Qu'ensems siam ilh et eu.
VII		Quar sos hom sui eu,
		No·l deu esser greu,
	75	Si fai ben al seu,
		Que mout lonjamen
		Ai estat per Deu
		Del tot al seu sen.
		E si per talen
	80	Pert tot mon joven,
		Pauc mi valran chan d'auzel.
		Mas s'a ma domna fos bel,
		Tener me pogr' en verdor
		Com son leial amador.
VIII	85	Sobr' autr' amador
		M'anet be d'amor,
		Quan l'emblei la flor,
		Qu'anc plus non aic eu :
		So·m ten en verdor,
	90	Quan tot l'als m'es greu.
		E s'alberga·l seu
		Per amor de Deu,
		Tener me pot lonjamen
		En valor et en bon sen
	95	Gai e cortes e novel,
		Com bela flor en ramel.
IX		Na Vierna, lonjamen :
		Vos ai estat de bon sen
		Mas era mi renovel,
	100	Com bela flors en ramel.