Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,001 Auteur: Peire Vidal Genre: Canso Numero: XIX

Ab l'alen tir vas me l'aire

I	1	Ab l'alen tir vas me l'aire
		Qu'eu sen venir de Proensa :
		Tot quant es de lai m'agensa,
		Si que, quan n'aug ben retraire,
	5	Eu m'o escout en rizen
		E·n deman per un mot cen :
		Tan m'es bel quan n'aug ben dire.
II		Qu'om no sap tan dous repaire
		Com de Rozer tro qu'a Vensa,
	10	Si com clau mars e Durensa,
		Ni on tan fis jois s'esclaire.
		Per qu'entre la franca gen
		Ai laissat mon cor jauzen
		Ab leis que fa·ls iratz rire.
III	15	Qu'om no pot lo jorn mal traire
		Qu'aja de leis sovinensa,
		Qu'en leis nais jois e comensa.
		E qui qu'en sia lauzaire,
		De ben qu'en diga no·i men ;
	20	Que·l melher es ses conten
		E·l genser qu'el mon se mire.
IV		E s'eu sai ren dir ni faire,
		Ilh n'aja·l grat, que sciensa
		M'a donat e conoissensa,
	25	Per qu'eu sui gais e chantaire.
		E tot quan fauc davinen
		Ai del seu bel cors plazen,
		Neis quan de bon cor consire.