Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,031 Auteur: Peire Vidal Genre: Canso Numero: XXV

Nuls hom no·s pot d'amor gandir

I	1	Nuls hom no·s pot d'amor gandir
		Pos el seu senhoriu s'es mes :
		O tot li plass' o tot li pes,
		Sos talens l'aven a seguir.
	5	E sapchatz qu'om enamoratz
		No pot segr' autras voluntatz,
		Mas lai on vol Amors lai cor
		E no·i garda sen ni folor.
II		Adonc saup eu pauc d'escrimir,
	10	Qu'anc no·m gardei tro qu'eu fui pres
		Co·l fols auzels, quant au lo bres,
		Que·s vai coitozamen aucir.
		Et eu coitos mis m'en tal latz,
		Don era·m tenh per enganatz ;
	15	Qu'en poder sui de tal senhor,
		Que no·m vol far be ni honor.
III		A re ho degr' om melhs fugir
		Com mal senhoriu, qui pogues.
		Mas fugir no li posc eu ges,
	20	Qu'outra la mar m'anet ferir
		Amors daus lo senestre latz
		Tal colp per qu'eu sui sai tornatz ;
		Don morrai d'ir' e de dolor,
		Si gaugz entiers no m'en socor.
IV	25	Et ab gaug me pogra garir
		D'ira ma domna, s'ilh volgues ;
		E per ma fe, s'a leis plagues,
		No·lh degra ma mortz abelir,
		Que totz sui seus hom domenjatz.
	30	E non o dic eu, so sapchatz
		Per so que·m fassa mortz paor,
		Mas quar ilh pert son amador.
V		Be degra ma domna chauzir
		Com sui tornatz en sas merces ;
	35	Quar per razo val bona fes
		Lai on falh poders de servir.
		Qu'en las ricas cortz pietatz
		Dezencolpa·ls plus encolpatz ;
		Per qu'umilitatz ab ricor
	40	Don' a totz autres jois sabor.
VI		D'autre mal me saubr' eu garir,
		Mas d'aquest me trenchet lo fres,
		Quan ma bela domna·m promes
		So don m'ac en cor a mentir.
	45	E servirs mal gazardonatz
		Aicel que·l pren es grans peccatz,
		Que per mal gazardonador
		Son paubre maint bo servidor.
VII		Domna, mas no m'en posc sofrir,
	50	Deus e chauzimens mi valgues,
		Que·m vengues de vos qualsques bes,
		Que non ai poder qu'als dezir.
		Si·m destrenh vostra grans beutatz,
		Qu'envazitz m'a·ls olhs e passatz,
	55	Si qu'el test n'ai la resplandor,
		Que·m tol lo sen e la vigor.
VIII		Senher coms de Peiteus, be·m platz,
		Car etz en l'aussor grat montatz,
		Que gens vos vei cobrar l'onor
	60	Que perderon vostr' ancessor.
IX		Sitot s'es mals Mos Castiatz,
		Dolors m'en pren e pietatz
		Quar es velhs e pren deshonor
		E·m tol Na Vierna e s'amor.