Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,010 Auteur: Peire Vidal Genre: Canso Numero: XXVII

Be m'agrada la covinens sazos

I	1	Be m'agrada la covinens sazos
		E m'agrada lo cortes temps d'estiu
		E m'agradon l'auzel, quan chanton piu,
		E m'agradon floretas per boissos
	5	E m'agrada tot so qu'als adregz platz
		E m'agrada mil tans lo bels solatz :
		Don per mon grat jauzirai lai breumen,
		On de bon grat paus mon cor e mon sen.
II		Amors mi te jauzent e deleitos,
	10	Amors mi ten en son dous recaliu,
		Amors mi te galhart et esforsiu,
		Per amor sui pensius e consiros ;
		Per amor sui tan fort enamoratz,
		Que d'amor son totas mas volontatz,
	15	Per amor am cortezi' e joven,
		Quar d'amor son mei fag e mei parven.
III		Bel m'es, bela domna, quan pens de vos,
		E bel quar sui en vostre senhoriu,
		Bel m'es quan n'aug bon pretz nominatiu,
	20	E bel quan vei vostras belas faissos.
		Bel m'es quan gart vostras finas beutatz
		E bel quar sui tan vostr' endomenjatz,
		Bel m'es quar ai en vos mon pensamen
		E bel quar am vos sola solamen.
IV	25	Deus vos sal, domna, quar etz bel' e pros,
		Mas ja no sal cels que son mal mescliu,
		E Deus sal me, quar vas vos m' umiliu,
		Mas ges no sal lauzengiers ni gilos.
		Deus sal los pros e·ls adregz e·ls prezatz,
	30	Mas ja no sal los enoios malvatz,
		Deus sal totz drutz, quant amon finamen,
		Mas ja no sal cel qu'ad enoi s'empren.
V		Domna, tan sui de vos vezer coitos,
		Domna, que d'als non ai mon cor pensiu,
	35	Domna, quar vos mi podetz far caitiu,
		Domn', e si·us platz, plus rics que·l reis N'Anfos.
		Bona domna, tan fort m'apoderatz,
		Domna, que d'als non es ma volontatz ;
		Domna, si·us platz, ajatz n'esgardamen,
	40	Domna, de tan que n'ajatz chauzimen.
VI		Fis gaugz entiers plazens et amoros,
		Ab vos es gaugz per que totz bes reviu,
		E non a gaug el mon tant agradiu,
		Que·l vostre gaugz fa lo segle joyos.
	45	Ab vos nais gaugz e creis devas totz latz,
		Per qu'eu n'ai gaug e Mos Bels Castiatz,
		E·m fai gran gaug, que cel mentau soven
		Lo gaug de vos e·l bel captenemen.