Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,037 Auteur: Peire Vidal Genre: Canso Numero: XXVIII

Pos tornatz sui en Proensa

I	1	Pos tornatz sui en Proensa
		Et a ma domna sap bo,
		Ben dei far gaia chanso,
		Sivals per reconoissensa :
	5	Qu'ab servir et ab honrar
		Qu'ab servir et ab honrar
		Don e benfait et honor,
		Qui be·l sap tener en car :
		Qui be·l sap tener en car :
II	10	Ses peccat pris penedensa
		E ses tort fait quis perdo,
		E trais de nien gen do
		Et ai d'ira benvolensa
		E gaug entier de plorar
	15	E d'amar doussa sabor,
		E sui arditz per paor
		E sai perden gazanhar
		E, quan sui vencutz, sobrar.
III		E quar anc no fis falhensa,
	20	Sui en bona sospeisso
		Que·l maltraitz me torn en pro,
		Pos lo bes tan gen comensa.
		E poiran s'en conortar
		En mi tuit l'autr' amador,
	25	Qu'ab sobresforsiu labor
		Trac de neu freida foc clar
		Et aigua doussa de mar.
IV		Estiers non agra garensa,
		Mas quar sap que vencutz so,
	30	Sec ma domn' aital razo
		Que vol que vencutz la vensa ;
		Qu'aissi deu apoderar
		Franc' umilitatz ricor,
		E quar no trob valedor
	35	Qu'ab leis me posc' aiudar,
		Mas precs e merce clamar.
V		E pos en sa mantenensa
		Aissi del tot m'abando,
		Ja no·m deu dire de no ;
	40	Que ses tota retenensa
		Sui seus per vendr'e per dar.
		E totz hom fai gran folor
		Que ditz qu'eu me vir alhor ;
		Mais am ab leis mescabar
	45	Qu'ab autra joi conquistar.
VI		E cel que long' atendensa
		Blasma, fai gran falhizo ;
		Qu'er an Artus li Breto,
		On avian lor plevensa.
	50	Et eu per lonc esperar
		Ai conquist ab gran doussor
		Lo bais que forsa d'amor
		Me fetz a mi dons emblar,
		Qu'eras lo·m denh' autreiar.
VII	55	Bels Rainiers, per ma crezensa,
		No·us sai par ni companho,
		Quar tuit li valen baro
		Valon sotz vostra valensa.
		E pos Deus vos fetz ses par
	60	E·us det mi per servidor,
		Servirai vos de lauzor
		E d'als, quant o poirai far,
		Bels Rainiers, car etz ses par.