Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,049 Auteur: Peire Vidal Genre: Canso Numero: XXX

Tart mi veiran mei amic en Tolzan

I	1	Tart mi veiran mei amic en Tolzan
		E tart veirai lo Pog e Monreial,
		Quar remazutz sui del tot a'N Barral,
		Mon Bel Rainier, que trop fin e certan.
	5	A ! Na Loba, domna, car no·us remir,
		Dels olhs vos plor e del cor vos sospir,
		Quan mi membra vostre cors avinens
		E·l dous parlars e la cara rizens.
II		E car avetz tan ric pretz sobeiran,
	10	Per enveja·us volon las melhors mal :
		Ma bela domna douss', a vos qu'en cal ?
		Qu'a totas podetz dir : tast'e milan.
		Car melhs sabetz honrar et acolhir,
		Per so·us vol hom mais vezer et auzir,
	15	Pos de beutat vest se vostre jovens
		E·l dous parlars e·l galhardi' e·l sens.
III		Na Raïmbauda, domna, d'aisso·m van,
		Qu'eu penrai ort a Biolh e cazal ;
		E si·us pagatz d'amor emperial,
	20	Per la montanh' oblidarai lo plan.
		A ! bela domna, cui am e dezir,
		Qu'eu no poirai jamais ses vos sufrir ;
		E prenda·us en merces e chauzimens,
		Pos en vos es mos cors e mos talens.
IV	25	Domna, ben aic l'alberc Saint Julian,
		Quan fui ab vos dins vostre ric ostal ;
		Qu'anc Deus no fetz tant avinen jornal,
		Com aicel jorn que·us formet de sa man.
		Meravilh me co·us saup tan gen bastir,
	30	Mas aitals armas fetz per mi aucir.
		Mas conort n'ai qu'etz trop ric' e valens
		Si m'aucizetz, honratz sui e jauzens.