Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,003 Auteur: Peire Vidal Genre: Canso Numero: XXXI

Amors, pres sui de la bera

I	1	Amors, pres sui de la bera,
		Quar m'etz tan de mala guiza ;
		Qu'eu cugei m'acsetz conquiza
		La gensor e la plus gaia
	5	Del mon, mas no·us platz qu'eu l'aia.
		Per qu'eu morrai dezesperatz,
		Amors, et er tortz e peccatz,
		Si d'aquest vostre benvolen
		Non avetz calque chauzimen.
II	10	Ja, s'eu saupes, non amera,
		Que m'en prezes d'aital guiza,
		Qu'era ma voluntat priza
		Cilh qu'es orgolhoz' e gaia
		Vas mi, e de mal qu'en traia
	15	No·lh cal, ans m'a mes en tal latz,
		Que jois ni deportz ni solatz
		D'autra no·m don' esbaudimen,
		Ni de leis nulh joi non aten
III		Per qu'eu ab bon grat m'estera,
	20	Fe que·us dei, ans de ma guiza,
		Qu'enquer non l'agra enquiza :
		E pero non es tan gaia,
		Qu'eu de leis mal non retraia,
		E dir n'ai enois e viltatz,
	25	Sitot s'es mensonj'e foudatz,
		Quar cors qu'es ples d'aziramen
		Fai ben failhir boca soven.
IV		Qu'eu vi ja l'ora qu'ilh era
		Franca e de bona guiza
	30	E sa boca gent apriza
		En parlar paraula gaia,
		Vas bon pretz fina e veraia,
		Sos cors adregz e gen formatz,
		D'ensenhamens e de beutatz,
	35	Que anc nulhs hom no vi tan gen
		Ni ab tan bel captenemen.
V		Mas ar m'es esquiv' e fera
		Tornad' e de brava guiza,
		Per que l'esperansa·s briza,
	40	Don fo ma volontatz gaia.
		Pos no·lh platz bes m'en eschaia,
		Peitz trac de mort, tan viu iratz.
		Ar sai e conosc qu'es vertatz,
		Que diable son sei paren,
	45	Qu'als seus dona pejor turmen.
VI		Tostemps, si·m legues, blasmera
		Leis que non es d'avol guiza ;
		Mainta mensonj' ai assiza
		En blasmar la domna gaia.
	50	Per qu'es razos qu'eu m'estraia.
		Mout mi part de s'amor forsatz ;
		E pos conosc que tan li platz,
		Sivals partrai m'en bonamen
		Et irai mon melhs enqueren.