Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,035 Auteur: Peire Vidal Genre: Canso Numero: XXXII

A per pauc de chantar no·m lais

I	1	A per pauc de chantar no·m lais
		Quar vei mort joven e valor
		E pretz, que non trob'on s'apais,
		Qu'usquecs l'empenh e·l gita por ;
	5	E vei tan renhar malvestat
		Que·l segle a vencut e sobrat,
		Si qu'apenas trop nulh paes
		Que·l cap non aj'en son latz pres.
II		Qu'a Rom' an vout en tal pantais
	10	L'apostolis e·lh fals doctor
		Sancta Gleiza, don Deus s'irais ;
		Que tan son fol e peccador,
		Per que l'eretge son levat.
		E quar ilh commenso·l peccat,
	15	Greu es qui als far en pogues ;
		Mas ja no volh esser plages.
III		E mou de Fransa totz l'esglais,
		D'els qui solon esser melhor,
		Que·l reis non es fis ni verais
	20	Vas pretz ni vas Nostre Senhor.
		Que·l Sepulcre a dezamparat
		E compr'e vent e fai mercat
		Atressi com sers o borges :
		Per que son aunit sei Frances.
IV	25	Totz lo mons es en tal biais
		Qu'ier lo vim mal et oi pejor ;
		Et anc pos lo guitz de Deu frais,
		Non auzim pois l'Emperador
		Creisser de pretz ni de barnat.
	30	Mas pero s'oimais laiss' en fat
		Richart, pos en sa preizon es,
		Lor esquern en faran Engles.
V		Dels reis d'Espanha·m tenh a fais,
		Quar tan volon guerra mest lor,
	35	E quar destriers ferrans ni bais
		Trameton als Mors per paor :
		Que lor orgolh lor an doblat,
		Don ilh son vencut e sobrat ;
		E fora melhs, s'a lor plagues,
	40	Qu'entr'els fos patz e leis e fes.
VI		Mas ja no·s cug hom qu'eu m'abais
		Pels rics, si·s tornon sordejor ;
		Qu'us fis jois me capdela e·m nais
		Que·m te jauzent en gran doussor ;
	45	E·m sojorn' en fin' amistat
		De leis qui plus mi ven en grat :
		E si voletz saber quals es
		Demandatz la en Carcasses.
VII		Et anc no galiet ni trais
	50	Son amic ni·s pauzet color,
		Ni·l cal, quar cela qu'en leis nais
		Es fresca com roz' en pascor.
		Bel'es sobre tota beutat
		Et a sen ab joven mesclat :
	55	Per que·s n'agrado·l plus cortes
		E'n dizon laus ab honratz bes.