Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,047 Auteur: Peire Vidal Genre: Canso Numero: XXXV

Tant an ben dig del marques

I	1	Tant an ben dig del marques
		Joglar truant e garbier,
		(Que tuit en son vertadier)
		Qu'eu no sai que m'en disses :
	5	Pero sua es valensa,
		On bos pretz nais e comensa,
		E·i renovela valor
		En fai dir vera lauzor.
II		E si·l reis Aragones
	10	No m'agues tout alegrier,
		Eu agra fin gaug entier
		Ab domnas de Carcasses,
		Don m'abelis e m'agensa
		Lor faitz e lor captenensa,
	15	E·l cavalier e·l comtor
		E·l baron e·l vavassor.
III		Per so m'an Lombart conques,
		Pos m'appellet « car messier »
		Tals qu'anc no vist nulh arquier
	20	Tan dreg ni tan prim traisses ;
		E·m fier al cor ses falhensa
		Ab un cairel de plazensa,
		Fabregat el foc d'amor,
		Temprat de doussa sabor.
III	25	E l'olh e·l cil negre espes
		E·l nas qu'es en loc d'arbrier,
		Ve·us l'arc de qu'aitals colps fier
		Ab un esgart demanes,
		Don escut no·lh fai garensa:
	30	E pos a leis platz que·m vensa,
		No m'o tenh a dezonor,
		Si·ls fortz venson li forsor.
IV		Tant es sos bels cors cortes
		E·l dig gai e plazentier
	35	Qu'el mon non a cavalier
		Que vezer no la volgues ;
		Que fag e dig e parvensa
		A de Monbel e d'Argensa
		E de Monrozier color
	40	E sa cambra es de Valflor.
V		Mil tans es doblatz sos bes
		Qu'el comte de l'escaquier,
		Qu'al seu fin pretz vertadier
		No sofranh neguna res ;
	45	Pos m'autrejet ses bistensa,
		M'a tengut lai en Proensa,
		Qu'ar sai son en mais d'onor
		E deu so·m penr' al melhor.
VI		E si mos Fraires saubes
	50	Que·m rete per soudadier,
		No·l tengran bojas d'acier
		Que vezer no la volgues.
		E trobera ses falhensa
		Dous frug d'onrada semensa
	55	E cort de valen senhor
		Ab un avinen trachor.