Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,014 Auteur: Peire Vidal Genre: Canso Numero: XXXVII

Bon' aventura don Dieus als Pisans

I	1	Bon' aventura don Dieus als Pisans,
		Car son ardit e d'armas ben apres,
		Et an baissat l'orgoill dels Genoes,
		Que·ls fan estar aunitz e soteirans :
	5	Per qu'eu volrai totz temps l'onor de Pisa,
		Car an baissatz los perfieitz orgoillos ;
		Que sol l'enois dels vilans borboillos
		Mi trenca·l cor e·l me fraing e·l me brisa.
II		Alamans trob deschauzitz e vilans ;
	10	E quand negus si feing esser cortes,
		Ira mortals cozens et enois es ;
		E lor parlars sembla lairar de cans ;
		Per qu'ieu non vuoill esser seigner de Frisa,
		C'auzis tot jor lo glat dels enoios :
	15	Anz vuoill estar entre·ls Lombartz joios,
		Pres de midonz, qu'es gaia, blanc' e lisa.
III		E pois mieus es Monferratz e Milans,
		A mon dan git Alamans e Tyes ;
		E si·m creira Richartz, reis dels Engles,
	20	En breu d'ora tornara per sas mans
		Lo regisme de Palerm' e de Riza,
		Car lo conquis la soa rezensos.
		De mi dic ben : si pel marques non fos,
		Non pretz cinc marcs una rota camisa.
IV	25	Era m'alberc Dieus e sains Julians
		E la doussa terra de Canaves ;
		Qu'en Proensa non tornarai eu ges,
		Pois sai m'acuoill Montferratz e Milans ;
		E s'aver puosc cella qu'ai tant enquisa,
	30	De lai s'estei lo valens reis N'Anfos,
		Qu'ieu farai sai mos vers e mas chansos
		Per la gensor qu'anc fos d'amor enquisa.
V		E pois Milans es autz e sobeirans,
		Ben volgra patz de lor e dels Paves,
	35	E que estes Lombardi' en defes
		De crois ribautz e de mals escarans.
		Lombartz, membre·us com Poilla fo conquisa,
		De las dompnas e dels valens baros,
		Com los mes hom en poder de garsos :
	40	E de vos fan entr'els pejor devisa.
VI		E N'Alazais tan vos ai ades quisa,
		Qu'ar l'uns en ten l'autre per enoios;
		Eu remandrai tant quant er faitz lo dos,
		Quar genser etz qu'anc fos d'amor enquisa.