Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 005,003 Auteur: Ademar de Rocaficha Genre: Canso Numero: IV

Si amors fos conoyssens

I	1	Si amors fos conoyssens
		ni·lh aondes sens,
		que conogues se,
		no feira tan mal ses be
	5	ni tant enueg ses plazer,
		e dissera ver
		a selh qui·l ser leyalmen;
		e for' avinen,
		que fis amicx vertadiers
	10	deu premiers
		en si mezeus demostrar
		qual volra l'autre trobar.
II		Mas tan iust es falhimens
		que premeiramens
	15	notz a luy don ve;
		doncs ben es fols qui·l mante;
		e qui falh per trop saber,
		pres es de chazer,
		que maynhtas vetz dreitz defen
	20	so qu'amors cossen;
		pero amicx dreituriers
		vai derriers;
		lai on amors vol renhar,
		razos no pot contrastar.
III	25	Amors apodera e vens
		paubres e manens;
		no·y esguara re,
		ni on se pauza no ve,
		e no·n la pot hom mover,
	30	pus vol remaner.
		Ad aital pes compra e ven
		que partis e pren,
		e no dupta lauzengiers
		ni parliers,
	35	e fai drutz frir' e tremblar
		amors e·ls maritz pensar.
IV		Ab totz aitals espavens
		li·m ren humilmens
		pres en sa merce.
	40	las! que·m val? que pro no·m te. —
		si fai, quar m'a dat poder
		qu'el cor aus voler
		so qu'ieu dezir mantenen
		vezer ses aten
	45	de lieys cuy sui messongiers
		ta sobriers,
		quar no puesc dizen lauzar
		los bes, don si fai honrar.
V		Que tant m'es douss' e plazens
	50	que per lo sieu mens
		(que·m fora gran re)
		o per so que no·lh sove,
		s'o pogues de lieys aver,
		pres d'alcun esper
	55	tot lo mon feira jauzen;
		que semblans no·n men;
		e·ls maltraitz e·ls cossiriers
		Mos guerriers
		feira totz en ioy tornar,
	60	e tornera en gaug plorar.