Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,033 Auteur: Peire Vidal Genre: Canso Numero: XLI

Per melhs sofrir lo maltrait e l'afan

I	1	Per melhs sofrir lo maltrait e l'afan
		Que·m don' Amors, don eu no·m posc defendre,
		Farai chanso tal qu'er leus per aprendre,
		De motz cortes et ab avinen chan.
	5	E fatz esfors, quar n'ai cor ni talan
		De far chanso, qu'ades planh e sospire,
		Quar no vei leis, don mos cors no s'azire,
		Quar tan m'es lonh la terr' e·l dous païs
		On es cela vas cui eu sui aclis :
	10	Per qu'ai perdut joi e solatz e rire.
II		A leis m'autrei ab ferm cor ses enjan,
		Quar totz sui seus per donar e per vendre ;
		E volh trop mais en bon esper atendre
		Leis cui soplei, don jois me vai tarzan,
	15	Que d'autr'aver bel fait e bon semblan ;
		Qu'ins en mon cor m'a fait Amors escrire
		Sa gran beutat, don res non es a dire,
		E son gen cors be fait e ben assis ;
		Per qu'eu li sui hom francs, fizels e fis,
	20	E per s'amor a las autras servire.
III		Deus, quan veirai lo jorn e·l mes e l'an,
		Qu'ela·m volha del mal gazardo rendre !
		Qu'eu non l'aus dir, melhs m'auzaria pendre,
		Mon coratge, quant eu li sui denan.
	25	Mas assatz pot conoisser mon talan,
		Qu'ilh es la res qu'eu el mon plus dezire.
		E per s'amor sofri tan greu martire
		Que la dolors m'a ja del tot conquis
		E·l deziriers que m'aura tost aucis :
	30	Et a·n gran tort, mas eu non lo·i aus dire.
IV		E si merces ab leis me valgues tan
		Qu'ela·m volgues lo seu bel bras estendre,
		Ja per tirar no·m feira escoissendre
		De tost venir humilmen mercejan
	35	Vas leis que m'a trastot en son coman,
		Que·m pot donar joi o del tot aucire,
		Que non ai ges poder qu'alhors me vire ;
		E si·l plagues que pres de si m'aizis,
		Be·m tenc per seu, mas melhs m'agra conquis,
	40	E feira·m ric e de gran joi jauzire.
V		Al pro marques, quar pretz e valor gran
		Manten e sap gen donar e despendre,
		E sos rics pretz fai los autres deissendre,
		Vas Montferrat, chansoneta, te man :
	45	Que·l seu ric fait son dels autres trian
		E per melhor lo pot om ben eslire,
		Qu'el es la flors de totz, a cui que tire,
		E de totz bes comensansa e fis.
		E s'aissi fos com eu volh ni devis,
	50	Corona d'aur li vir' el cap assire.