Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,008 Auteur: Peire Vidal Genre: Canso Numero: XLII

Baros, Jezus, qu'en crotz fo mes

I	1	Baros, Jezus, qu'en crotz fo mes
		Per salvar crestiana gen,
		Nos mand'a totz comunalmen
		Qu'anem cobrar lo sant paes,
	5	On venc per nostr' amor morir.
		E si no·l volem obezir,
		Lai on feniran tuit li plag,
		N'auzirem maint esquiu retrag.
II		Que·l sant paradis que·ns promes,
	10	On non a pena ni tormen,
		Vol ara liurar francamen
		A cels qu'iran ab lo marques
		Outra la mar per Deu servir ;
		E cels que no·l volran seguir,
	15	No·i aura negun, brun ni bag,
		Que no·n posc' aver gran esglag.
III		Ar vejatz del segle quals es,
		Que qui·l sec plus al peitz s'empren ;
		Pero no i a mas un bon sen :
	20	Qu'om lais los mals e prenda·ls bes.
		Que pos la mortz vol assalhir,
		Negus no·i pot ni sap gandir,
		Que pos tuit morrem atrazag,
		Ben es fols qui viu mal e lag.
IV	25	Tot lo segle vei sobrepres
		D'engan e de galiamen ;
		E son ja tan li mescrezen
		Qu'apenas renha dreitz ni fes,
		Que chascus ponha en traïr
	30	Son amic per si enrequir.
		Pero·lh trachor son aissi trag
		Com cel qui beu toissec ab lag.
V		Catalan et Aragones
		An senhor honrat e valen
	35	E franc e larc e conoissen,
		Humil et ardit e cortes.
		Mas trop laissa enmanentir
		Sos sers, cui Deus bais et azir ;
		Qu'a totz jorns estan en agag
	40	Per far en cort dan et empag.
VI		Reis aunitz val meins que pages,
		Quan viu a lei de recrezen
		E plora·ls bes qu'autre despen
		E pert so que·l pair' a conques.
	45	Aitals reis fari' ad aucir
		Et en lag loc a sebelir,
		Qui·s defen a lei de contrag
		E no pren ni dona gamag.
VII		Domnas velhas non am eu ges,
	50	Quan vivon descauzidamen
		Contr' Amor e contra joven ;
		Quar fin paratg' an si mal mes,
		Greu es de comtar e de dir
		E greu d'escoutar e d'auzir ;
	55	Quar fin domnei an aissi trag
		Qu'entre lor non trobon escag.
VIII		Domna, si·m tenetz en defes
		Que d'al re non ai pensamen
		Mas de far vostre mandamen.
	60	E s'en grat servir vos pogues
		Entre·l despolhar e·l vestir,
		Ja mais mals no·m pogr' avenir ;
		Quar vostre dig e vostre plag
		M'an sabor de roza de mag.
IX	65	Reis de Leon, senes mentir
		Devetz honrat pretz recolhir,
		Com cel qui semen' en garag
		Temprat d'amor ab dous complag.