Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,030 Auteur: Peire Vidal Genre: Canso Numero: XLIII

Neus ni gels ni ploja ni fanh

I	1	Neus ni gels ni ploja ni fanh
		No·m tolon deport ni solatz,
		Que·l temps escurs mi par clartatz
		Pel novel gaug en que·m refranh ;
	5	Quar joves domna m'a conques,
		E s'eu leis conquerre pogues,
		Quan la remir tant bela·m par,
		Que de gaug cugera volar.
II		Mas l'austors qu'es pres en l'aranh,
	10	Qu'es fers tro qu'es adomesjatz,
		Pois torna maniers e privatz,
		Si's qui be·l tenha ni l'aplanh,
		Pois val mais d'autre quant a pres ;
		Tot atretals uzatges es,
	15	Qui jove domna vol amar,
		Que gen la deu adomesjar.
III		Ab pauc de foc fon l'aur e franh
		L'obriers entro qu'es esmeratz,
		Don l'obr' es plus plazens assatz :
	20	Per que del lonc maltrag no·m planh.
		Et si·l focs d'amor s'esprezes
		En leis si com en mi s'espres,
		De ben o mal pogra chantar ;
		Mas hom no·s deu dezesperar.
IV	25	A drut de bona domna tanh
		Que sia savis e membratz
		E cortes et amezuratz
		E que no si trabalh ni·s lanh.
		Qu'amors ab ira no·s fai ges ;
	30	Amors es mezur' e merces,
		E drutz que a bon cor d'amar
		Deu ab gaug l’ira refrenar.
V		Ab bona domna m'acompanh,
		E platz me jovens e beutatz
	35	E plai me cors gen faissonatz ;
		Mas no mi platz bars que·m reganh
		Ni que trop li dur sos arnes ;
		Qu'eu en conosc tals dos o tres
		Qu'om pogues per vilas comtar,
	40	Ab sol que saubesson arar.
VI		Las aventuras de Galvanh
		Ai eu e mai d'autras assatz ;
		E quan sui en caval armatz,
		Tot quan consec pesseg e franh.
	45	Cen cavaliers ai totz sols pres
		E d'autres cent ai tout l'arnes ;
		Cen doumas ai faitas plorar
		E autras cen rire e jogar.
VII		A l'uzatge·m tenh de l'Estranh,
	50	Que quan no·m sen aventuratz,
		Eu m'esfortz tan deves totz latz
		Qu'eu pren e conquier e gazanh.
		E si mos afars m'avengues
		D'aisso de que·m sui entremes,
	55	A mon emperi ses duptar
		Feira tot lo mon soplejar.
VIII		Ar ai conquist sojorn e banh
		E Mauta, on sui albergatz
		Ab lo comt' Enric, de que·m platz,
	60	Que negus bos aibs no·l sofranh.
		Larcs es et arditz e cortes
		Et estela dels Genoes
		E fai per terra e per mar
		Totz sos enemics tremolar.
IX	65	Ab lo comt' Arman m'acompanh
		Quar es francs e gent ensenhatz,
		Tot enaissi com si fos natz
		A Tolosa part Caramanh.
		Ardimen a d'Aragones
	70	E gai solatz de Vianes
		E sembla mi de domnejar
		E·l rei de Leon per donar.
X		Eu sui senher dels Genoes,
		Que·ls grans e·ls paucs ai totz conques :
	75	Li gran mi fan tot mon afar
		E·l pauc m'onron e·m tenon car.