Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,030a Auteur: Peire Vidal Genre: Canso Numero: XLIV

Non es savis ni gaire ben apres

I	1	Non es savis ni gaire ben apres
		Cel que·s blasma d'Amor ni mal en ditz :
		Qu'Amors sap gen donar gaug als marritz
		E fai tornar lo malastruc cortes
	5	E chascun fai de falhiment gardar,
		Qui gen la sap car tener e celar ;
		Et als falhitz don' avinen perdo
		E·l fin aman son per lei car e bo.
II		Ben aja·l temps e·l jorn e l'an e·l mes
	10	Cel dous cors gais, plazentiers, gen noiritz,
		Per los melhors deziratz e grazitz,
		De lei qu'es tan complida de totz bes
		Que·m saup ferir al cor d'un dous esgar
		Don ja no·m volh departir ni sebrar ;
	15	Quar ges non es dona, ni er, ni fo
		De tan bons aibs ab tan gentil faisso.
III		Anc mais a nul aman tan ben non pres
		Ni tan non fo de fin joi enrequitz,
		Com eu cel jorn que mos chans fo auzitz
	20	Per vos, domna, e·us plac que retraisses
		Vostra lauzor e·l pretz complit e car ;
		E s'ieu sai ren d'avinen dir ni far
		Vostra beutatz e l'onors m'ochaiso
		Qu'eu tenc engual d'un complit guiardo.
IV	25	Tant m'avetz dat pois que m'agues conques
		Que autre don per me no·us er queritz ;
		Mas vostre cors que lo meillor chauzitz
		Sap que conven gardar en totas res ;
		Pero cel qui sesquerre vol donar
	30	Ben fai lo don mais mil tans a prezar,
		Qu'eu ai ben vist ses querre far ric do
		E dons queritz mermar lo miels del pro.
V		Mon ferm voler, domn', ai tant en vos mes
		Que ja non er delognatz ni partitz,
	35	E quar d'amor soi eu si conqueritz
		Ben dei rendre d'esta preison merces ;
		Ben fo astrucs qui primiers saup amar,
		C'om qu'es cortes en sap meils esquivar
		Enueg, villania e falhizo,
	40	Per qu'eu estauc en bona sospeisso.
VI		Senher Guilhem Malaspina, Deus gar
		Vostra valor e·l pretz complit e car
		Qu'en vostrob'om joi e solatz e do
		Per qu'eu vos volh prezentar ma chanso.