Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 097,007 = 364,032 Auteur: Blacatz , Peire Vidal Genre: Tenso Numero: XLVI

Peire Vidal, pos far m'ave tenso

I		BLACATZ
	1	Peire Vidal, pos far m'ave tenso,
		No·us sia greu, si·us deman per cabal
		Per qual razon avetz sen tan venal
		En maints afars que no·us tornon a pro,
	5	Et en trobar avetz saber e sen ;
		E qui ja velhs en aital loc aten
		Et en joven n'es atressi passatz,
		Meins n'a de be que si ja no fos natz.
II		PEIRE VIDAL
		Blacatz, no tenh ges vostre sen per bo,
	10	Quar anc partits plait tan descomunal,
		Qu'eu ai bo sen e fin e natural
		En tot afar, per que par be qui so,
		Et ai m'amor meza e mon joven
		En la melhor et en la plus valen ;
	15	No volh perdre los guizardos ni·ls gratz,
		Car qui·s recre es vilas e malvatz.
III		BLACATZ
		Peire Vidal, ja la vostra razo
		No volh aver a mi dons que tan val,
		Que·lh volh servir a totz jorns per engal,
	20	E d'ela·m platz, que·m fassa guizardo,
		Et a vos lais lo lonc atendemen
		Senes jauzir, qu'eu volh lo jauzimen,
		Quar loncs atendres sens joi, so sapchatz,
		Es jois perdutz, qu'anc us no fo cobratz.
IV		PEIRE VIDAL
	25	Blacatz, no sui eu ges d'aital faisso,
		Com vos autres, a cui d'amor no cal ;
		Gran jornada volh far per bon ostal
		E lonc servir per recebre gen do.
		Non es fis drutz cel que·s camja soven,
	30	Ni bona domna cela que·l consen ;
		Non es amors, ans es engans proatz,
		S'oi enqueretz e deman o laissatz.