Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 258,001a=282,018a Auteur: Jacme Grill , Lanfranc Cigala Genre: Tenso Numero: VIII

Per o car vos fegnetz de sotilment entendre

I	1	Per o car vos fegnetz de sotilment entendre,
		vos prec qem respondatz, en Lafranc, ses atendre:
		qals es la piegiers res — e si met grant e mendre —
		qe sia en est mond, q'om tochar puesc'o prendre?
	5	e si aizom dires, del cobleiar defendre
		vos poires ab chascun q'ab vos voilla contendre.
II		En Jacme, pos vos plac vostr'arc sobre mi tendre,
		aizo qem demandatz vos voil tal respos rendre
		don ia vos nom poscatz encolpar ni reprendre:
	10	la lengu'es tot lo piegz el miels q'om pot comprendre
		e cella qi pot mais pron tener e offendre;
		e s'alre sabetz piegz, de vos o voil aprendre.
III		En Lafranc, non cugei faillissetz ad eslire,
		mas ar avetz dig zo don pluzors faretz rire,
	15	qar la lengua non ha poder mas quant del dire
		zo qeil manda lo cor, segon lo meu albire,
		donc es pegiers cellui, don mou mals: escondire
		nous en podetz, s'ieu ia haia zo q'ieu dezire.
IV		En Jacme, semblan faiz qe siatz bos dormire,
	20	tan tost vos oblides zo qem volguest devire,
		qals fos la piegiers res q'om toche ni remire,
		et avetz dich del cor, on hom non pot assire
		tocha ni vista d'oill; mas qar lous plac escrire,
		ieu crei qeus aviatz prestat vostre conzire.