Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 041,001 Auteur: Austorc de Segret Genre: Sirventes Numero: VII

No sai qui·m so, tan suy desconoyssens

I	1	No sai qui·m so, tan suy desconoyssens,
		ni say don venh, ni say on dey anar,
		ni re no say que·m dey dire ni far,
		ni re no sai on fo mos nayssemens,
	5	ni re no say, tan fort suy esbaytz,
		si dieus nos a o diables marritz,
		que crestias e la ley vey perida,
		e sarrazi an trobada guandida.
II		Yeu vey gueritz los paguas mescrezens
	10	e·ls sarrazis e·ls turcx d'outra la mar
		e·ls arabitz, que no·n cal un gardar
		del rey Felip, dont es grans marrimens,
		ni d'en Karle, qu'elh lur es caps e guitz;
		no sai dont es vengutz tals esperitz,
	15	que tanta gens n'es morta e perida,
		e·l reys Loix n'a perduda la vida.
III		Anc mais no vim del rey que fos perdens,
		ans l'avem vist ab armas guazanhar
		tot quant anc volc aver ni conquistar,
	20	mas eras l’es vengutz abaissamens;
		et es ben dreitz, quar es a dieu falhitz;
		qui falh a dieu en remanh' escarnitz,
		qu'anc mais no fo mas per Karl’ escarnida
		. . . . . . . . . . . . . . . . . . . . . . .
IV	25	Ar aura ops proez' et ardimens
		a·n Audoart, si vol na Enric veniar,
		qu'era de sen e de saber ses par
		e totz lo mielhsera de sos parens;
		e si reman aras d'aisso aunitz,
	30	no·l laissaran ni cima ni razitz
		frances de sai, ni forsa ben garnida,
		si sa valors es de pretz desgarnida.
V		Guerra mort . . . . . . . sanglens
		qu . . . . . . . . . pogues escapar,
	35	. . . . . . . no conogues s . . . . .
		. . . . . mor et ab desca . . . . .
		. . . gra vezer e ca . . . . . . . .
		e derrocar fortz castelhs ben bastitz,
		e qu'om crides soven „a la guerida“
	40	a·n Audoart, qu'a la patz envazida.
V		Mosenhor n'Oth, qu'es de donar razitz,
		de Lomanha, e de pretz caps e guitz,
		fatz a ssaber que Karles nos desguida
		e·l reys frances, don la gleyza es aunida.
VI	45	Mos sirventes, Cotellet, sia digz
		mo senhor n'Oth, qu'es lauzatz e grazitz;
		per los plus pros a sa valor grazida,
		e donar t'a rossin a la partida.