Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 053,001 Auteur: Bernart Alanhan de Narbona Genre: Sirventes Numero: X

No puesc mudar qu'ieu non diga

I	1	No puesc mudar qu'ieu non diga
		so que tant lo cor mi rayssa:
		malvestatz el mon tan gayssa
		per que patz de nos s'avanta,
	5	e quar dieus, qu'es clardatz e rays,
		no conoyssem, cossi's verays.
II		Quascus a far ben se triga,
		e de mal far nulhs no·s layssa,
		don tenem via biayssa,
	10	e no·ns remembra ges l'anta
		ni·l greus turmens que Jhezus trays
		entre·ls vils felhs iuzieus savays.
III		Lo mons es si cum la triga
		que, miran se, sos natz layssa;
	15	atressi erguelhs nos bayssa,
		don perdem la ciutat sancta,
		on foram alegres e guays,
		si·l plazer de dieu fessem mays.
IV		Trop soferr al colh greu biga
	20	selh que d'autruy grays s'engrayssa,
		e qui l'aver d'autruy cayssa
		tratz, non a sen plus qu'efant a,
		e selh qu'ab lo paupre s'irays,
		no·y's de la ira de dieu l'ais.
V	25	Ricx, ponhens plus que guarriga,
		iferns vos estrenh e·us fayssa
		e·us vay dolan ab tal ayssa
		que no·us te pro cotz ni manta;
		e si anc fes tensos ni plays,
	30	lay vos yssira tot pel cays.
VI		Selh que per sos peccatz riga
		sos huelhs ploran, planta e playssa,
		don melhor frug que d'avayssa
		n'aura lay on fis gaugz canta;
	35	mas pauc vezem que negus bays
		la crotz ploran, on dieus plors frays.
VII		Verays dieus, on ver'amors nays,
		fai nos venir al ver palays.